Nongstoiñ, Nailur 16: Ka District Magistrate West Khasi Hills District, ka la pynmih ïa ka hukum hapoh Section 163 jong ka Bharatiya Nagarik Suraksha Sanhita (BNSS) 2023, ban khang ïa ka jingshet jingbam harud surok, ka jingpynjaboh bad ka jingbret jaboh khlem da pynbeit ha ki jaka jngohkai, harud ki surok bad kiwei ki jaka paidbah hapoh ka district.
Kane ka hukum ka la mih hadien ka jingïoh khubor shaphang ka jingkiew ki jingjia kiba kum kine, kiba lah ban pynwit ïa ki nongjngohkai, ki nongleit nongwan bad ki paidbah, nalor ka jingktah ïa ka jingkhuid bad ka jingitynnad jong ki jaka paidbah, ki surok bad ki jaka jngohkai.
Ka hukum ka khang ïa ka jingshet bam harud surok, kaba kynthup ïa ka jingpyndonkam dieng, rnga, LPG cylinder, gas stove lane kiwei kiwei pat, ha ki bynta harud surok, ki jaka harud surok, jaka jngohkai bad kiwei ki jaka paidbah, lait noh tang ha ki jaka ba la pynbeit kyrpang lane ba la ai jingbit.
La khang ruh ïa ka jingpynjaboh bad jingbret jaboh, kaba kynthup ïa ki plastic, jingbam basah, ki bilor um, tin bad kiwei kiwei kum ki tiar song bam, kiba pyn jaboh ïa ka sawdong sawkun, la ka dei ha ki jaka jngohkai, harud surok, khlaw, ki na la, ki jaka um bad kiwei ki jaka paidbah. La khang ruh ïa ka jingbret ne theh jaboh khlem da pynbeit lane kiba long um ha ki jaka bym pat la ai jingbit.
Kane ka hukum ka khang ruh ïa kino kino ki kam kiba long beaiñ ne pyrshah hukum ha ki jaka paidbah hapoh West Khasi Hills District. Kino kino kiba pynkheiñ ïa kane ka hukum kin shah pynshitom katkum Section 223 jong ka Bharatiya Nyaya Sanhita (BNS), 2023.
Ïa kane ka hukum la pynmih ha ka 16 tarik u Nailur, 2026, namar ka jingdonkam kyrkieh ban shim ïa ki lad jingïada bad kan treikam noh ha baroh kawei ka West Khasi Hills District.
