Shillong, Nailur 16: Ka Meghalaya State Badminton Association (MSBA), hapoh ka jingpeit jong ka Badminton Association of India (BAI), ka la plie paidbah ïa ka North East Zone Inter-State Badminton Championship 2026 hynne ka sngi Balang ha Jawaharlal Nehru Indoor Sports Complex, Shillong.
Haba wanphai biang sha Meghalaya ha ka sien ba nyngkong naduh u snem 2016, kane ka lympung ka shakri kum ka rynsan ïaknieh rung kaba thikna na ka bynta ki jingïalehkai kynhun jong ka National Games 2027 kaba la khmih lynti bha, ha Meghalaya.
Kane ka lympung ba la sdang naduh hynne ka 16 tarik u Nailur haduh ka 19 tarik u Nailur 2026, ka la wanrah lang ïa palat 250 ngut ki nongïalehkai ba kynsai kiba mihkhmat ïa baroh 8 tylli ki jylla ka thaiñ shatei lammihngi (Northeastern States): Assam, Arunachal Pradesh, Meghalaya, Mizoram, Manipur, Nagaland, Tripura, bad Sikkim, ha kaba kawei pa kawei ka jylla ka la pynrung ïa ki nongïalehkai ba tbit tam ba ki la jied ban ïa aireng ha ki kyrdan ïakhun bapher bapher.
Ki riew pawkhmat kiba la ïadon lang ha ka sngi plie pyrda ki long u bah Wailadmiki Shylla, Myntri ka tnad Sports ka Sorkar Meghalaya; u Omar Rashid, Conveneur jong ka Tournament Committee, Badminton Association of India (BAI); Alertson Nongbri, Director jong ka Directorate of Sports & Youth Affairs jong ka Sorkar Jylla; P. B. War Nongbri, Deputy Director ka tnad ïalehkai; K. Passah, Assistant Director ka Directorate of Sports & Youth Affairs jong ka Sorkar Jylla; Dr. C. O. Rangad, Senior Vice President ka MSBA; Sh Rajesh Kamal-General Secretary ka MSBA; Gautam Mahanta-Treasurer ka Assam Badminton Association bad kiwei kiwei ki nongïalam jong ki synjuk ba ïatreilang.
Haba ai jingkren kum u kongsan, u bah Wailadmiki Shylla, Myntri ka tnad ïalehkai ka sorkar Meghalaya, u la ong ba ka jingwanphai biang jong kane ka lympung sha Shillong hadien shiphew snem ka poi ha ka por kaba biang bha, namar ba ka Meghalaya ka pynkhreh ban pynlong ïa ka National Games kaba 39 ha u snem ban wan.
“Ngi sngewthuh ba la thaw ïa u nongjop na kane ka jait rynsan,” da kaba pynksan ba ki samla ki donkam ïa kum kine ki lad bad ki rynsan ban ïa aireng pyrshah ïa kiwei pat ki Jylla.
Hadien ba u Myntri ka tnad Sports ula pynbna paidbah ba la sdang ïa ka lympung la pynbud sa ka jingshim smai kaba la ïalam da u kapten ka kynhun badminton jong ka Meghalaya.
