Ban kyrshan ïa ki jingdawa ki MLA ka UDP kiba don ka jingthmu ban pynïasoh sha ka BJP

Shillong, Nailur 15: Hapdeng ki jingkhmih lynti halor ki 8 ngut ki MLA jong ka UDP kiba kwah ban ïasoh bad ka BJP, u nongthaw aiñ ba rangbah jong ka BJP u Bah AL Hek ha ka sngi Ba-ar u la ong ba ki jingdawa jong ki ki ïahap bad ka agenda jong ka BJP hi na ka bynta ka jylla.
La ïathuh ba ki MLA ka UDP ki la pynïadei ïa ka jingthmu pynïasoh jong ki bad dawa ïa ka jingpyntreikam ïa ka ILP, ka jingpynrung ïa ka ktien Khasi ha ka khyrnit ba phra bad kiwei kiwei ki lad jingïada.
Haba kyrshan ïa ka nongrim jong ki, u bah Hek u la ong, “Na ka bynta ka jingmyntoi jong ka Jylla bad ki trai ri trai muluk, nga sngewnguh ïa ki mat ba ki wanrah.Ngi ruh ngi la rah ïa kine ki mat naduh mynshwa ban pyntreikam ïa ki.”
Haba ai jingmut ïa ka lad ban pynïaid shakhmat halor ka ILP, u la ong ba ka jingpyntreikam ïa ka MRSSA ka lah ban shim kum ka sienjam kaba kyrkieh.
“Kumba ka long mynta lada ka ILP kam long, ai ba ka MRSSA kaba lah ban pyntreikam noh mynta, kam don jingeh satia”, u la ong. Halor ka jingdawa ban ithuh ïa ka ktien Khasi kaba dei ka mat jingdawa kaba la slem bha, u Bah Hek u la ong ba kam don kano kano ka jingeh ha ka liang ka ain.
“Katba ïa ka ktien Khasi kan ym don jingeh, lah ban mynjur ha ka kynhun myntri bad ka ïing dorbar ban ithuh ïa ka ha ka Eighth Schedule, kam don jingeh satia”, u la ong.
“Ngi dang pynbor ruh na ka liang ka BJP, kam dei tang ka jingdawa na ka UDP.Ngi don kijuh ki jingdawa ban pyntreikam ïa kine ki mat, ïa ka MRSSA ruh lah ban pyntreikam”, bynrap biang u bah Hek.
Haba kylli halor ka kam tih dewiong, u Hek u la kyntait ban kren eiei, da kaba ong ba katei ka mat ka dei kaba don hapoh jong ka ain (sub-judice).
“Ngam lah ban ong eiei halor kata namar ba ka dang don ha ïing kashari, kane ka mat ka long subjudice, kam dei ka kam jong nga ban kren halor kane”, u la ong.