Nongstoiñ, Nailur 15: Ka seng West Khasi Students Union ka la kyntu ïa ki Internet point Agency naduh ka Jio, Airtel, BSNL bad kiwei ban bud ryntieh ha ki rukom pynïaid beit ha ki rukom treikam, ym tang ban shu kamai pisa na ki paidbah.
Ka WKSU hadien ka jingthnum bad jingbitar ki paidbah ka thaiñ sepngi halor ka jingpynïaid ban die bad jingbym lah treikam ha ki kor internet, teknoloji kane ka juk ban pyndonkam da ki nongthied, kumta ka la dawa ïa ki kompani ba ki dei ban da shimkhia bad pynbiang na ka bynta ka jingdonkam ki paidbah.
Ka seng ka la lap ba ki nongdie internet ki shim kabu shaba palat pud, ha kaba ki die ïa ki network jong ki tang lada ka jingpynmeh bording na ka tnad MePDCl ka bteng sam bording ne ka bording. Lada ki nongdie internet ki don la ki jong ki tower ryngkat ki kor ki bor ban pynneh slem ïa ka jingtreikam ki bor network, balei ym lah ban leh.
U Bah D. Sun President ka seng u la ong, “Ngi kyrmen haman ki tower ba don ki kor generator (G.M), hynrei balei pat ym lah ban pynneh ïa ka Teknoloji lyngba kita ki kor ba la pynap lypa jia ba lada thud ka bording ba supply na ka tnad bording?. Balei ym lah ban pynim ïa ka network da kaba pyntrei kam da ka kor generator”.
“Ki nongshong shnong ka West Khasi Hills ki la shah thok bun sien, dei na kata ka daw ka seng kam banse ban buddien lane wat ban kyntu ïa kitei ki nongpynïaid ïa ki kor ki bor internet teknoloji, ba kin pyndonkam hok ïa ki jingdie jong ki katkum ka dor ba phi die network sha ki paidbah nongthied”.
“Dei ruh ban die ne pyntreikam 24 kynta, ka por ba kin die sha ki nongthied, lym kumta ka long kaba lehraiñ hakhmat u paidbah ha ki jingthok jong ki lyngba ka jingdie internet jong ki khlem ïaid katkum ki kyndon treikam ka company”, u la ong.
“Ka seng ka kyntu ïa kine ki company network ha ka thaiñ, ba kin bud ryntieh ïa ki kyndon ban die ban thied network sha u paidbah. Lada bakla ka seng kan shim da kiwei pat ki lynti kham tyngeh nangne shakhmat”, ong u Bah Sun.
