Mab noh ïa ka ram ki nongri sniang, markhmat dawa ka HFU na u Myntri Rangbah

Shillong, Nailur 14 : Ka Synjuk jong ki Nongrep ha ka jylla hapoh ka lama jong ka Hill Farmers Union (HFU) ha ka sngi Nyngkong ka la dawa na ka sorkar jylla ba kan mab noh ïa ki ram jong ki nongri sniang kiba la shah ktah jur na ka jingwan syllad ka khlam African Swine Fever (ASF) ha Meghalaya.
Ïa kane ka jingdawa ka HFU hapoh jingïalam u President, Bah Commander Shangpliang ka la pynpaw ha ka jingïakynduh markhmat bad u Myntri Rangbah ka Jylla hynne ka sngi.
Kumban shu kdew hangne, dang ha ka taiew ba la dep ka HFU ka la pynlong ïa katei ka jingïaid paidbah ryngkat bad ki sniang ban pynpaw ïa ka jingeh kaba ki nongri sniang ki ïakynduh namar ka jingpur jong ka ASF kaba la buh jingeh ïa ki ban siew ïa ka ram ri sniang hadien ba ki sniang ba ki ri ki la ïap lut.
Haba kren bad ki lad pathai khubor, u President u la ïathuh ba ka ka la pynpaw shai ha ka jingïakynduh ba ki nongri sniang kiba la duh noh ïa ki sniang jong ki namar ka khlam ASF ki dei ban ïoh jingïarap pisa na ka Sorkar. Ka seng ka la dawa ruh ban pyllait ïa ki ram kiba ki nongri sniang ki la shim lyngba ka Piggery Mission, namar kiba bun ki la duh lut ïa ki jingri bad ki la shem jingeh ruh ban siew ïa ki ram.
“Kumno kin siew ïa ka ram haba ki sniang jong ki baroh ki la ïap?” buh jingkylli u President.
U la ong ba u Myntri Rangbah u la pynpaw ba ka jingai jingïarap pisa bad ka jingpyllait bad mab ïa ka ram ka long kaba eh, hynrei u la kular ban ïakren shwa bad ki ophisar jong ka tnad ba dei peit halor kane ka mat.
U President u la ong ruh ba ka seng kan ym sngap jar lada ka Sorkar kam shimkhia ïa ka jingeh jong ki nongri sniang kiba la shah ktah.
“Ngin ym sngap jar lada ka Sorkar kam ai jingïarap,” u la maham.
Nalor ka jingdawa jingïarap pisa bad ban pyllait noh na ka ram, ka HFU ka la pynpaw ruh ïa ka jingdonkam ban pynkhlaiñ ïa ki lad jingïada ban khanglad ïa ka jingpur biang jong ka khlam
Ka seng ka la dawa ban pynkhlaiñ ïa ki veterinary checkpoint, ki jaka ban peit bad bishar ïa ka koit ka khiah jong ki mrad bamdoh ba wanrah na shabar bad ruh ki jaka ban buh ïa kine ki jingri bad ban peitngor ïa ka jingwanrah ïa ki sniang shapoh jylla.
U la kynnoh ba ka jingpur jong ka khlam ASF ka lah ban ïadei bad ka jingwanrah ïa ki sniang shapoh Meghalaya khlem da leh ïa ka jingtalasi kaba biang ïa ka koit ka khiah jong ki. U la ong ba lada don ki veterinary checkpoint kiba biang, yn lah ban lap ïa ki sniang kiba la shah ktah ha ka jingpang bad khanglad ïa ki ban pynrung shapoh jylla.
U la pynpaw ruh ïa ka jingeh kaba ki nongri sniang ki ïakynduh ha kaba ïadei bad ka insurance.
Katkum ka jingong jong u, ki nongri sniang bunsien ki hap ban pyni ïa ki dur bad leh postmortem ban ïoh ïa ka bai luksan na ka insurance. Hynrei lada ki ap haduh ba ki sniang kin ïap ban leh ïa ka postmortem, ka jingpang ka lah ban pur sha kiwei pat ki sniang kiba dang koit.
“Ngi hap ban tep noh ïa ki sniang watla kim pat ïap. Kumno ngin ïoh ïa ka insurance?” u la kylli.
Ka HFU ka la pynpaw ruh ïa ki jingmut halor ka Agriculture Policy kaba thymmai jong ka jylla.
Halor kane, u la ïathuh ba u Myntri Rangbah u la pyntip ba ka draft jong ka Agriculture Policy ka la don ha ka website jong ka Sorkar na bynta ban ïoh ïa ki jingai jingmut na ki paidbah.
U la ong ba ka HFU kan phah ïa ki jingai jingmut jong ka, bad ka kyntu ïa ki nongrep bad nongri jingri baroh kawei ka jylla ban pule ïa ka draft bad phah ïa ki jingai jingmut sha ka tnad Agriculture.
U la pyntip ruh ba katkum ka jingong jong u Myntri Rangbah, la khmih lynti ba ka Agriculture Policy kan lah ban pyndep pura ha u Risaw mynta u snem.