Kaei kaei ne kano kano ka lah ban jia lada urlong ki mat ba ngi dawa: Olan

Shillong, Nailur 11: Ka drama phet seng hapoh ka United Democratic Party (UDP) ka la wan ka jingkylla kaba khraw ha ka sngi Thohdieng hadien ba u MLA ka Mawsynram u bah Olan Sing Suin u la pynbna paidbah ba ka kynhun ki nongthaw ain jong ka UDP kiba don 8 ngut ki ba dang ïa kren bad ka BJP bad lada urlong ki mat jingdawa kin leit ban pynïasoh.
“Kaei kaei ka lah ban jia lada ki mynjur ïa ki jingdawa jong ngi.Kaei kaei ka lah ban jia, nga ong ïa phi”, la ong u Bah Suin ha ki nongthoh khubor hadien ka jingialang jong ka CEC jong ka UDP, da kaba pynpaw ïa ka jingkynthoh kaba khlain tam haduh mynta.
Haba kylli hato ka dei ka jingïalang CEC kaba khatduh jong u kum u MLA ka UDP, u Bah Suin u la phuh samrkhie bad ong, “Ngam tip namar kaei kaei ka lah ban jia.”
U la pynpaw ïa ki jingdawa ba la buh hakhmat ki nongïalam ka BJP – ban pynrung ïa ka ktien Khasi ha ka Khyrnit kaba phra, ban weng noh ïa ka jingkhang tih dewïong, ban pynkynriah ïa ka Harijan Colony na Them Iew Mawlong, ka FCRA bad Meghalaya Residents, Safety and Security Act (MRSSA).
“Kine ki dei ki mat, ki seng bhalang ruh ki dawa, ka Assembly ka la mynjur ïa ki resolution, lada ka sorkar pdeng ka mynjur ïa kine ki jingdawa jong ngi te kaei ka jingeh?” u la ong.
Da kaba kam ba u dei u bynta jong ka “mishon jong ka kynhun kaba don 8 ngut ki dkhot,” u Bah Suin u la kyntait ba ka jingkheiñ ka long phra ngut, ym khyndai ngut.
“Ngi don ka team mission kaba don 8 ngut.Lada ka mission jong ngi ka long kaba urlong, kano kano ka lah ban jia, kata ka dei ka sain pyrthei, ka sain pyrthei ka lah ban kylla ha ka shisngi”, u la ong.
Halor ka jingkyntait jong u kham mynshwa shaphang ka jingleit sha Delhi, u Bah Suin u la pynshai, “Ha kata ka sngi katto katne na ka kynhun ki don ha Delhi.Nga don ha shnong la jong.Ngi ïaphiah ïa ka kam.Ynda ki la wan phai, ngi la ïakren.”
Haba kylli hato ka jingrung sha ka BJP ka long kaba kut lada ki jingdawa ki long kiba la pynurlong, u la ong, “Hooid,kano kano ka lah ban jia, ha kano kano ka por.”
Haba kyntait ïa kano kano ka jingiateh na ka bynta ki shuki myntri, u Bah Suin u la ong, “Ym don jingïakren na ka bynta ki shukimyntri.Ka NPP ka dei ka party kaba bun tam ki MLA kaba don haduh 33 ngut.Ngi dang pynbor tang ïa ki mat jingdawa.”
Watla u la leit sha ka jingialang jong ka CEC ka UDP, hynrei u Bah Suin u la ong ba u la kren pynpaw ïa la ka nongrim hapoh ka jingialang.
“Nga la pynpaw shai kdar hapoh ba ka jingiakren bad ka BJP ka dang ïaid”, u la ong.