Ka jaka treikam ka Facilitation Centre ha Umling ka rit eh, heh ki jaka bam, yn shong pyrkhat biang ka KSU

Nongpoh, Nailur 09: Ka Khasi Students’ Union (KSU), North Khasi Hills District Unit, ryngkat bad ki bor pynïaid distrik Ri-Bhoi, hadien ka jingïalang kaba la long ha ophis u Deputy Commissioner ka Ri-Bhoi, mynta ka sngi ki la leit ban jurip ïa ka Facilitation Centre ha Umling, kaba dei kawei na ki mat dawa jong ka seng sha ka Sorkar Meghalaya ban pynkhlaiñ ïa ka rukom talasi bad khmih ïa ka jingrung bad jingmih jong ki briew na shabar ka jylla.
Ka seng ka pynpaw ba ka Facilitation Centre ka dei ban long nyngkong eh ka jaka talasi ïa ki briew bad ki kali kiba rung sha ka jylla, khnang ban pynkhlaiñ ïa ka jingpyrshang ban tehlakam ïa ki kam be-aiñ, khamtam ïa ka jingwanrah bad jingpynphriang ïa u drok.
Haba kren sha ki lad pathai khubor hadien ka jingjurip, u President ka KSU North Khasi Hills District, u Bah Ferdinald Kharkamni, u la ong ba ka seng kam hun ïa ka rukom pynbeit ïa ka jaka ha katei ka Facilitation Centre namar ka long kaba rit eh ban buh ïaki kamra jong ki tnad treikam bapher bapher ka sorkar katba ka jaka kaba heh la mang naka bynta ban buh ki dukan bam.
U la pynkynmaw ba ha u snem 2020 la plie ïa ka Facilitation Centre ha Umling da ka jingthmu ban pynkhlaiñ ïa ka rukom talasi bad ban pyrkhing ïa ka jingrung bad jingmih jong ki briew na shabar ka jylla, khamtam ban pynduna ruh ïaki kam sniew namar kumba long mynta ka long laitlan shaba palat.
Hynrei, ha ka jingjurip mynta ka sngi, u la ong ba ka jaka ba pynmang naka bynta ban buh ïa ar tylli ki ophis bad kawei ka jaka shongthaid ka long kumba 1000sq ft, katba ka jaka ba shim ka tnad tourism naka bynta 11 tylli ki dukan ka long kumba 11500sq ft, bad kum ka seng ka la pynpaw ïa ka jingduh mynsiem namar ka jaka treikam jong ki tnad sorkar bapher bapher ka long kaba rit, katba ki jaka na bynta ki jaka bam ne Food Court ki long kiba heh.
U la ong ruh haba ïadei bad ka jingwan ki nongtrei bylla kiba wan lyngba ka MRSSA haei kin shong bad kin bam namar kine ki 11 tylli ki dukan ki dei ki dukan kiba rem bad ngim tahrai ba kita ki nongbylla kin bam ïa kita ki jingbam kiba rem dor, bad lada kata ka Facilitation Center kan long long tang 1 hajar sq ft bad ka jaka bam kan long 11500sq ft ka long ka bym lah ban pdiang bad kum ka seng ngin sa shong pyrkhat biang bad ki nongïalam ka CEC ba ngin pyrshang ban ïakren bad ka sorkar ban ai shuh shuh ka jaka khamtam bun ban pynlong ïaka rukom treikam haduh ki por ban wan ba kan long kaba itynnad bad kaba kylluid, bad ki nongleit nongwan kin nym shah pyndik haka por ba ki wan haba ki leit ban register ïaki kyrteng jong ki.