Na ki 9 tylli ki PHC la kyntiew kyrdan CHC ïa ki 3 tylli ha ka jylla

Shillong, Nailur 04: Ki la don haduh 7 tylli ki Primary Health Centre (PHC) kiba la kyntiew kyrdan bad kumba 3 tylli pat ki Community Health Centre (CHC) kiba la kyntiew kyrdan da ka tnat ka Health and Family Welfare ka sorkar ha kine ki por kiba la leit.
Ki khubor ba la ïoh na ka sorkar lyngba ka tnat ka Koit ka Khiah la ïathuh ba ki 7 tylli ki PHC kiba la kyntiew kyrdan ki long ka 2 tylli ha West Jaiñtia Hills, 2 tylli ha West Garo Hills, 2 tylli ha North Garo Hills bad kawei ha Ri Bhoi District bad baroh ki long 7 tylli.
Nangta ki 3 tylli ki CHC pat kiba la kyntiew kyrdan ki long, 1 ha North Garo Hills, 1 ha East Khasi Hills bad kawei ha South Garo Hills District.
Ha kaba ïadei pat bad ka PHC kaba dang tei thymmai kadei kawei bad kata kadei ka Urban PHC kaba ha Lumparing, East Khasi Hills District.
Ha kawei pat ka liang halor ka jingdon ka percentage jong ki nongshong shnong kiba khlem la kynthup hapoh ka MHIS khlem da kheiñ lang ïa ki nongtrei sorkar ka long 3.15%.
Shuh shuh ka tnat ka pyntip ruh halor ki kam ba sdang thymmai lyngba ka mang tyngka 2026-27 na ka bynta ki jingtei hapoh ka tnat ka Koit ka Khiah ka long ka jingpynïar pynheh ïa ka Shillong Civil Hospital bad ka jingtyrwa na ka bynta kane ka jingpynheh bad ka jingaiti ïa ka jaka da ka Red Cross Society ka kam ka dang ïaid.
Ka khubor ka la ïathuh ba ka don ruh ka jingtei jong ka Umniangbyrnai Parila MCH Hospital, Ri Bhoi bad kane ka projek la pyndep. Nangta ka jingtei ïa ka Nonstoiñ MCH Hospital, West Khasi Hills bad kane ka projek ruh lah pyndep, halor ka jingtei ïa ka Resubelpara Civil Hospital ha Chidaret, North Garo Hills kane ka projek lah jan pyndep bad ka kam ka la ïaid kumba 98%.
Ka jingtei ïa ka Mahendraganj MCH Hospital ha South West Garo Hills, kane ruh ka projek ka la jan dep bad ka kam haduh kine ki sngi ka la ïaid kumba 90% bad la khmih lynti ban pyndep noh kloi.