Mawkyrwat, Nailar 31: Ha ka 29 tarik u Nailar, 2026, ha ka por kumba 6:10 janmiet, la lap ïa ka metïap jong uwei u rangbah uba ym pat lah ban ithuh, namar ka met ka la jot rathai.
Ha ka jingïathuh khubor na u Bah B. Jyrwa, MPS, Superintendent of Police jong ka South West Khasi Hills District, Mawkyrwat, u la ong ba la lap ïa ka metïap jong uwei u briew ha kawei ka wah ha Phodpynton, hapoh ka shnong Mawranglang, Lai Kyntoit, South West Khasi Hills District. Haduh mynta, ym pat lah ban ithuh ïa une u briew bad ym pat lah ruh ban tip ïa ka rta jong u.
U la ïathuh ruh ba ka metïap la lap ha ka dur kaba kyllaiñ bad kaba la sahkut hapdeng ki maw hapoh ka wah. Ha ka met, la lap ba u briew u phong tang da ka patlun lyngkot (short pant) rong ïong, katba ka bynta kaba shalor jong ka met ka la lait.
Shuh shuh, u la ong ba la lap ruh ïa kawei ka taweez kaba la teh da ka tylliat ha ka bynta kaba shalor jong ka kti kamon. Ka met ka la jot rathai bad la sakhi ïa ki dak jong ka jingkylla rong bad ka jingjot jong ka met, ryngkat bad ka jingdon ki maggots (ki khñiang kiba mih na ka met kaba la jot) ha ki bynta jong ka met kiba lait.
Namar ka jingjot rathai jong ka met, ym pat lah ban pynshisha ïa ka daw jong ka jingïap, u la ong.
Kumta, u Bah B. Jyrwa u la ïathuh ba la pynkynriah noh ïa ka metïap sha Civil Hospital Shillong na ka bynta ban pynlong ïa ka Post Mortem Examination, bad ka jingtohkit halor kane ka dang ïaid shakhmat.
