New Delhi, Aug. 30: Ki jaiñ Ryndia jongka Meghalaya kiba la thaiñ da ki kti ki la kiew sha ka rynsah pyni riam ha Bharat Mandapam, New Delhi bad kane hi ka la rah ïa ka nam bad burom jong ki jaiñ Ryndia jong ka jylla namar la rah ïa kine ki jaiñ tynrai, kaba pyni ruh ïa ka sap bad ïa ka kolshor ha ka Delhi Fashion Week 2026.
ïa kane ka jingpyni riam la pynlong ryngkat lang bad ka Film Expo India ha ITPO, Bharat Mandapam. Ka Meghalaya ka la pyninam ha ka rynsan kaba long shi bynta jong ka International Reinvent Northeast Season 8, ka sienjam jongka Delhi Fashion Club ban lum lang ïa ka rukom thaiñ jaiñ, ki jaiñ tynrai, ki nongthaiñ bad ki nongpynwandur itynnad bad ïa ka jingriewspah kaba rim bajah hakhmat jong ki paidbah ka ri.
Ki jaiñ kiba la pynkhreh kyrpang lyngba ka jaiñ Ryndia na Meghalaya la thaiñ da ka Iaineh, ka nongthaiñ jaiñ na Ri-Bhoi, sha ka rynsan jong ka ri ryngkat bad ka jingpynwnadur itynnad kaba leh da ka Designer na Shillong, ka Batkyntilin Mawthoh. Kine ki jaiñ kiba la shna kyrpang ki la pynkynmaw biang ïa ka rukom thaiñ jaiñ tynrai ka jylla ha ka rynsan pyninam da ka jingpynneh pynsah pat ïa ka jinglong tynrai ka jongki.
Nalor kane, la pynbyrngia ïa ki nongpeitkai da ka nongshad ka jylla ka Kanchan Chakma, kaba ïadon bynta bad ka Sony Entertainment Television’s, Super Dancer Chapter 5, kaba la ïaid pyninam ha katei ka rynsan.
Ka khana kaba kongsan, hi ka dei shaphang kitei ki jaiñ tynrai. Ka jingpyninam ka la pyni ïa ka jingtbit ki nongthaiñ ïa ka rukom pynwandur ïa kitei ki jaiñ bad ka jinglah ban kyntiew shuh shuh ïa ki jaiñ tynrai sha ka rynsan jong ka jingpynwandur itynnad bha, ha ka jingpyniriam, bad ki lad ban pynitynnad bad pyniphuh ïa kine ki jaiñ tynrai.
Kane ka jingpyninam ka Meghalaya kala long ruh kum ka jingrakhe kaba ïar ka jylla ha kaba ïadei bad ka kolshor tynrai, kaba pyni ïa ka jinglong tynrai ki Khasi, Garo bad Jaintia. Ka jingshad Manipuri kala pynshongkun ïa kane ka jingpyni riam da kaba wanrah sa ïa kawei pat ka bynta jong ka jingpyninam ïa ka kolshor ba ïar ka thaiñ ha katei ka rynsan.
ïa kane ka sienjam la lamkhmat da ka Delhi Fashion Week Founder bad President bad Celebrity Fashion Director u Harshit Dhingaun, ïa uba la bna nam ha Meghalaya bad ha kylleng ka thaiñ shatei lam mihngi lyngba ka rynsan Digital ka jongu “TheVOY – Voice of Youth”.
U Dhingaun baroh shi katta ula pynleit jingmut halor ka kolshor, ki briew bad ka kam jngohkai ha ka thaiñ shatei lam mihngi da kaba banjur ban ïaleh ban pynpawnam shuh shuh ïa ka jinglong jingman jong kane ka thaiñ baroh kawei.
Kane ka sienjam kaba ïar, la pyni ruh ïa ka kamram jong ki kynthei kiba thaiñ bad suh ïa ki jaiñ bad ki kynthei kiba seng kam dalade ha ka ban pynneh pynsah ïa ki jingthaiñ tynrai ha ryngkat bad ka jingwad ïa ki lad ki lynti ban jam shaphrang ha ka ban leh ïa kiei kiei kiba long thymmai ha ka rukom pynwandur pynwandar.
ïa ka Meghalaya, kane ka rynsan ka la long kum ka lad ban pynïasoh bad ki kam thain jain bad ki iew kiba thymmai, ka jingsuh ha ka rukom pynwandur bha bad ka jingriewspah kaba naduh hyndai hynthai ha ka ban ïohi da ka ri baroh kawei.
ïa kane ka prokram la kyrshan bad bei tyngka da ka NEHHDC, ryngkat ka jingkyrshan ka North Eastern Council (NEC) hapoh jongka Ministry of Development of North Eastern Region (DoNER) jongka Sorkar India. Ka dei ruh kaba la pynïasoh lang bad ka jingsengkam lajong kaba la mihkhmat da ka PRIME Meghalaya.
Ha Bharat Mandapam, ka la dei ka pali jong ka jaiñ Ryndia ban pynlong ïa kane ka Fashion, kaba rah ïa ka khana jong ka Meghalaya ha ka rynsan jong ka ri hapoh New Delhi.
