Sha ka Sorkar ngan sa pynsngew halor ka jingwan lyngshop ka khlam sniang: Renikton

Mawkyrwat, Nailar 30: U Bah Renikton Lyngdoh Tongkhar, MLA ka Mawkyrwat Constituency, u la pynpaw ïa ka jingsngewkhia halor ka jingwan lyngshop jong ka khlam sniang hapoh ka jylla Meghalaya, kaba la ktah ruh ïa ka thaiñ Mawkyrwat baroh kawei.
Namarkata, ha kaba ïa kane na ka liang ki nongri sniang na ka thaiñ ruh ki la pynsngew ïa ki jingeh bad jingduhnong jong ki sha u kum u nongmihkhmat paidbah, namar ba ki ju kyrmen ban ïoh jingmyntoi na ka kam ri sniang, hynrei na ka daw jong kane ka khlam, ki la mad ïa ka jingduhnong kaba khraw.
Kumta ha kaba ïa dei bad kane ka mat, u Bah Renikton u la kyntu ïa baroh ki nongri sniang hapoh ka thaiñ Mawkyrwat ba kim dei ban shu sngap ne noh mynsiem haba ki sniang jong ki ki ïap na kane ka jingpang, hynrei ki dei ban ai jingpyntip sha ki ophis ba dei peit ïa ka kam ri jingri, kata ka Husbandry & Veterinary Department, lyngba ka jingïoh jingmynjur na ki rangbah shnong khnang ba kan long ka jingïarap bad ban shim ïa ki sienjam kiba donkam.
Haba kren ha ki lad pathai khubor, u bah Renikton Lyngdoh Tongkhar kum u nongmihkhmat paidbah u la ong ba un sa pynsngew ïa kane ka mat sha ka Sorkar lyngba u Myntri ba dei peit ïa ka Husbandry & Veterinary Department, ka Sorkar Meghalaya, khnang ban thaw ïa ki lad ki lynti ban ai jingïarap ïa ki nongri sniang kiba la mad ïa ka jingduhnong na kane ka jingpang khlam.
Ha kajuh ka por, u la kyntu bad ai jingmut ruh ïa ki nongri sniang ba ki dei ban pyrkhat ban leh ïa ka insurance na ka bynta ki sniang jong ki, namar lada jia ka jingïap jong ki sniang na ki daw kiba la kynthup ha ka insurance, ki lah ban ïoh ïa ka jingïarap lyngba ka insurance.