Donkam da ki vocational ban pyntbit ïa ki samla katkum ka jingdonkam ha ka thaiñ jong ki: Dr. Mehtab

Shillong, Nailar 30 : Ka MLA ka NPP na Gambegre, Dr, Mehtab Chandee A Sangma, ka la ai jingïaroh ïa ka CM-IMPACT namar ka la ïarap ha ka jingkiew jong ka jylla ha ka result jong ka Secondary School Leaving Certificate lane ka Matrik. Ka la ong ruh ba ka jylla mynta ka dei ruh ban pynleit jingmut ha ka jingpule kaba paka kaban poi bad kham pynmyntoi wat haduh ki jaka ba kyndong tam jong ka jylla.
Haba shim bynta ha ka mat ïatai ha ka Dorbar Synrai kaba dang shu kut shen halor ka phang kaba ïadei bad ka pule puthi ha ka jylla, ka Dr. Mehtab ka la ong ba ka jingrukom treikam jong ka sorkar ka la wanrah ka jingkylla ha ka result jong ka SSLC ha kine ki khyndiat snem.
“Ka CM-IMPACT ka la pyni ïa ki result kaba bha shibun. Dei na ka CM-IMPACT ba ngi la lah ban ïohi ba ka percentage jong kiba pass ha ka SSLC ka la kiew na ka 54.80 persen sha ka 97.26 peresen mynta u snem. Ka percentage jong kiba sangeh noh shiteng na ka jingpule ka la hiar bha na ka 17.4 persen sha ka 6.7persen,” ka la ong.
Hynrei, ka la maham ba ka jingkiew ka percentage jong kiba pass kam dei ban shim kum ka dak ba baroh ki bynta jong ka pule puthi ki la kiew.
“Watla kine ki result ki long kiba sngewtynnad, ngi dang donkam ban bishar biang ïa ka result baroh kawei,” ka la ong.
Katkum ka jingong jong ka, ka don ka jingduna kaba jur jong ki skul Higher Secondary ha ki thaiñ nongkyndong ka Meghalaya, da kaba kdew ba bun na ki skul higher secondary ki bun tang ha Shillong bad Tura.
“Ha constituency jong nga, don tang kawei ka skul HSSLC. Haduh mynta ki khynnah skul ki dang donkam ban leit ïaid 2-3 kynta ban poi sha ki centre jong ki. Ka jingdon ki skul Higher Secondary kam long ryntih ha baroh ki distrik,” ka la ong, bad ka la kyntu ïa ka tnad Pule Puthi ban pynlong ïa ka sorbe katkum ki district khnang ban don ïa ki skul ha ka rukom kaba ïa ryngkat lang.
Ka la ai jingmut ruh ban seng ki centre ai jinghikai halor ka rep ka riang ha ki thaiñ nongkyndong, khnang ban ai lad da kawei pat ka lynti ïa ki khynnah kiba ym lah ban bteng ïa ka pule puthi hadien ka SSLC.
“Ngi dei ka imlang sahlang kaba shaniah ha ka rep ka riang. Mynta ngi don la ka jong ka skulbah. Don ki course bad ka curriculum kaba lah ban pynbeit kyrpang katkum ka jingdonkam jong ki samla jong ngi. Ngi donkam ki institute ai jinghikai kiba pynleit jingmut ha ka rep ka riang ha ki thaiñ nongkyndong,” ka la ong.
“Ki khynnah skul kiba lah ban don bun ki daw kiba pynlong ïa ki ban ym leit bteng ïa ki jingpule shabar bad kumta kim lah shuh ban bteng ïa ka jingpule jong ki kumta ki dei ban ïoh ïa ka lad ban pule noh da ka lain vocational katkum ka jingdonkam jong ki,” ka la bynrap shuh shuh.