Shillong, Nailar 30: Arngut ki nongïalehkai phutbol ka jylla Meghalaya, ka Sanfida Nongrum bad u Phrangki Buam ki la ïoh ïa ka jingithuh na ka bynta ka jingïalehkai ba kyrpang jong ki ha ka samoi ïalehkai ba la dep ha ka miet sam khusnam jong ka Football Players Association of India ha ka miet sngi Saitjaiñ.
Ka Sanfida ka la shah jied na ka bynta ka khusnam ‘Women’s Young Player of the Year’ katba u Phrangki Buam u la khur ïa ka khusnam ‘I-League Player of the Year’.
Ka Sanfida ka la sdang mih madan nyngkong ïa ka ri mynta u snem, da kaba pynkhihjar ha ka jingïalehkai ba nyngkong jong ka ha ka AFC Women’s Asian Cup 2026 ha Australia ha u bnai Lber. Nangta ka la khur ïa ka khusnam ‘Most Valuable Player’ jong ka lympung SAFF Women’s Championship 2026, ba ka India ka la rah ïa ka nam lahduh.
U Phrangki Buam ruh u la long u MVP da lade jong ka Indian Football League (ka kyrteng ba thymmai jong ka I-League). U la long u nongïalehkai trai ri ba bun kol tam da kaba thep 8 tylli ki kol, kaba duna tang shi kol na u nongthep kol ba bun tam jong ka IFL (u Marcus Joseph uba la thep 9 kol). Ka klob kaba u ïalehkai, ka Shillong Lajong FC, ka la pyndep ïa ka samoi ha ka kyrdan ba ar.
Ha kane ka miet sam khusnam jong ka FPAI, ka khusnam kaba kordor tam kaba la tip da ka ‘Indian Player of the Year’ bad ka ‘Indian Women’s Player of the Year’ la khur da u Lallianzuala Chhangte bad ka Manisha Kalyan.
Ki kyrteng jong ki nongïalehkai kiba la khur khusnam ha kane ka FPAI Annual Awards:
Indian Player of the Year: Lallianzuala Chhangte
Indian Women’s Player of the Year: Manisha Kalyan
Young Player of the Year: Sanan Mohammed K
Women’s Young Player of the Year: Sanfida Nongrum
Foreign Player of the Year: Miguel Figueira Damasceno
I-League Player of the Year: Phrangki Buam
Coach of the Year: Owen Coyle
Women’s Coach of the Year: Anthony Andrews
Coach Education Award: Savio Medeira
Player Performance & Development Award: Rapid Sports & The Right Weigh
ISL Champions 2025-26: East Bengal FC
IWL Champions 2025-26: East Bengal FC Women