Da ka National Conference bad ki Secretary I&PR ban pynkhlaiñ jingïatreilang ka Sorkar Pdeng bad ki jylla

New Delhi, Nailar 27: Ka Tnad Information & Broadcasting ka la pynlong ïa ka National Conference bad ki Secretary jong ki Tnad Information and Public Relations jong ki jylla bad ki Union Territory ha nongbah New Delhi mynta ka sngi. Ha kane ka jingïalang la ïadonlang ki heh ophisar na ka Sorkar Pdeng bad ki Jylla ban ïamir jingmut halor ki sienjam ba kongsan bad ban pynkhlaiñ ïa ka jingïatreilang ha ki kam ai jingtip, ka jingpynbna paidbah, ki media bad ka ïoh ka kot kaba ïadei bad ka kam saiñdur.
U Secretary ka Tnad Information & Broadcasting u Chanchal Kumar, u la pynïaid ïa kane ka jingïalang bad u la ïakren ruh bad ki ophisar jong ka Jylla/UT kiba la ïashim bynta ha ki jingïaphylliew jingmut. Haba kren shaphang ka jingthmu jong u Myntri Rangbahduh badon burom, ha kaba la buh ïa ka bor bad ka ïoh ka kot ba ïadei bad ka kam saiñdur jong ka India hapdeng ki Saptdhara, ki hynñiew tylli ki lad jong ka jingkiew shaphrang jong ka ri, u Secretary u la ban jur ïa ka jingdonkam jong ka jingïatreilang kaba kham khlaiñ bad kaba kham ryntih hapdeng ka sorkar Pdeng bad ki Jylla ban pyndonkam ïa ka bor ba ïar jong ka India bad ban pynkhlaiñ ïa ka jingai jingtip paidbah. U la ong ba ka ïoh ka kot kaba ïadei bad ka kam saiñdur, kaba kynthup ïa ka kolshor, ka kam saiñdur bad ka khaïi pateng, ka don ka lad ban pynmih ïa ki lad ïohkam ïohjam, ban khring ïa ki nongbei tyngka bad ban kyntiew ïa ka bor jong ka India ha ka pyrthei.
Haba ban jur ïa ki jingkhlaiñ bapher bapher jong ki Jylla bad ki Union Territory, u Secretary u la ong ba ym lah ban don kawei ka rukom na ka bynta ka jingkiew shaphrang jong ka ïoh ka kot kaba ïadei bad ka kam saiñdur. U la ban jur ba dei ban pyndonkam ïa ki bor ha ka kolshor, ki bor jong ki jaka treikam bad ka sap jong man la ka Jylla bad ka Union territory ban pynurlong ïa ka lad saiñdur jong ka.
U la ban jur ruh ïa ki bynta ban kyntiew ïa ka jingïatrei lang hapdeng ka Sorkar Pdeng bad ki Jylla, kynthup ïa ki jingdon jingem, ka jingsuk ban sdang ïa ki kam, ka jingkyntiew ïa ka bor treikam, ki prokram kiba ïadei bad ki thaiñ bad ki kam saiñdur. Ki rynsan jong ka rikum ka WAVES 2027, ka WAVES Bazaar, ka WaveX bad ka Create in India Challenges ki lah ban ai ïa ki nongsaiñdur bad ki start-up na kylleng ka ri ka lad kaba kham heh ban ïoh ïa ki ïew, ki nongbei tyngka, ka teknoloji bad ki jingïatreilang ha ka pyrthei.
Ki ophisar jong ka Jylla bad UT kiba ïashim bynta ki la ïasam ïa ki jingshem bad ki jingeh jong ki ha kaba ïadei bad ka jingpyntreikam ïa ki sienjam bapher bapher bad ki la ïakren ïa ki lad ki lynti ban pynkhlaiñ shuh shuh ïa ka jingïatreilang bad ka Tnad. La ïakren ruh shaphang ka jingdonkam ban kyntiew ïa ka bor treikam ha ki Jylla, ha kaba ki Jylla ki pan ïa ka jingkyrshan kaba radbah na ka Tnad lyngba ka jingkyntiew ïa ka jingai jingtip, ka jingïatreilang bad ki jingïalang ba man ka por. Ki ophisar ki la pynpaw ruh ïa ka jingkwah jong ki ban ïatreilang khamjan bad ka Tnad bad ban ïashim bynta shitrhem ban pynkhlaiñ ïa ka ïoh ka kot na ki kam saiñdur.
Ha kane ka jingïalang, la pynlong ïa ki jingïamir jingmut halor ki katto katne ki phang kiba kongsan, kynthup ïa ka jingpyntreikam ïa ka rukom treikam Right of Way (RoW) na ka bynta ki nongpynbiang cable da ki Sorkar Jylla; ka jingpynkhreh na ka bynta ka WAVES 2027; ka jingpynkhlaiñ ïa ka WAVES Bazaar bad ka jingïoh rung sha ki ïew ki hat; ka jingpynheh ïa ki jingdon jingem ban ai jingtip paidbah; ka jingkyntiew ïa ki prokram ba la shna da ki nongpyndonkam ha ka rynsan Waves OTT; ka jingpynïasoh ïa ki rynsan Indian Cine Hub (ICH) bad Film Facilitation Office (FFO); bad ka jingpdiang ïa ka rynsan single-window ICH na ka bynta ki jingïoh jingbit ban ring phlim bad ki jingpyni live ïa ki prokram.
Ka jingïalang ka la ïakren ruh ban pynkhlaiñ ïa ka jingpynbna paidbah lyngba ka jingpynmih lang ïa ki prokram, ki prokram ba kyrpang jong ki Jylla bad ka jingkyntiew ïa ka jingai jingtip sha ki paidbah; ka jingkyntiew ïa ka kam pyni live ïa ki prokram; ka jingkyntiew ïa ka bor treikam jong ki ophisar DIPR lyngba ki lad ai jinghikai jong ka IIMC; ka jingkylla sha ka rukom treikam digital hapoh ka Press and Registration of Periodicals (PRP) Act, 2023 lyngba ka Press Sewa Portal; bad ka jingpynkhlaiñ ïa ki jaka buh kot lyngba ka jingpynpoi ïa ki kot sha ki Sorkar Jylla hapoh ka rukom treikam Samagra Shiksha.
Ka jingïalang ka la ïamir jingmut ruh halor ki mat kiba bun kiba ïadei bad ka jingai jingtip sha ki paidbah, ka kam pyni live ïa ki prokram, ka jingkyntiew ïa ka bor treikam ki ophisar jong ka DIPR, ka jingpynkylla digital ha ka kam media & jingpynmih prokram bad ki sienjam ai jingtip sha ki paidbah.
U Secretary u la kyntu ruh ïa ka jingïatreilang kaba jan hapdeng ki Regional Office jong ka PIB, ki Tnad Information and Public Relations jong ka jylla, bad ki regional unit jong ka Doordarshan bad Akashvanina ka bynta ki prokram ba kyrpang ba ïadei bad ki jylla bad ka jingpynsaphriang jingtip. U la pynpaw biangba ka Tnad ka kloi ban pdiang ïa ki jingmut thymmai, ki sienjam ba ïalam da ka Jylla bad ki rukom ïatreilang ban pynkhlaiñ ïa ka ïoh ka kot ba ïadei bad ka kam saiñdur bad ban kyntiew ïa ka jingai jingtip sha ki paidbah.
Ha kane ka jingïalang la sakhi ïa ka jingïashim bynta na ki heh ophisar jong ka Tnad Information & Broadcasting, ryngkat ki Secretary I&PR bad ki nongmihkhmat na ki Jylla bad ki Union Territory ha kylleng ka ri, kaba pyni ïa ka jingïatreilang kaba jan bad ka jingïatreilang hapdeng ka Sorkar Pdeng bad ki Jylla.