Nang pynshaikdar ka Sorkar halor ki kyndon pynshitom hapoh ka Migrant Workers Rules

Shillong, Nailar 27 : U Myntri Rangbah u Conrad K Sangma ha ka sngi Balang ula ong ba ka Kynhun Myntri ka la wanrah shuh shuh ïa ki jingshai halor ka jingpyntreikam bad ki jingpynshitom hapoh ka Meghalaya Identification, Safety & Security of Migrant Workers Rules.
U Conrad u pyntip ba ia ki jingpynsngew jong u Lat ka Jylla ruh lah pynrung lang ha kane ka Rules.
“Ka kyndon thymmai kaba u Lat ula ai ki jingmut, kito ki jingpynkylla lah kynthup lang mynta. Ki don katto katne ki bynta ba ïadei bad ka jingshai haba phai sha ka jingbatai ïa ki Ophisar bad ki rukom treikam. Ngi la ngam jylliew bha ïa ki bynta ba ïadei bad ki Nongtrei kiba lah ban leit jurip, kumno ban pynlong ïa ka jingjurip, ka bor ba ki don, kaei ka jingpynshitom ba ki lah ban leh”.
U ong ba kane ka Rules bala pynkylla thymmai, ka la ai jingshai ruh halor ka kuna, ka jingset phatok bad ka jingbishar aiñ.
“Yn sa ai ïa ki jinghikai kiba donkam sha ki nongtrei ba dei khmih ki ban pyntreikam ïa ka rule” bynrap u Conrad.
Ka kynhun Myntri ka la ai jingmynjur ruh ïa ka rule jong ka Meghalaya Flood Plain Zoning Act, 2026 ban lah pyntreikam noh ïa kane ka aiñ.