Halor ka kam thied jaka puta : Dei ka EC ka VPP ha KHADC ba thmu pynduh bor ïa ki Dorbar Shnong, Raid, Hima: CM

Shillong, Nailar 25 : U Myntri Rangbah ka Jylla Conrad K Sangma ha ka sngi Ba-Ar ula pynphai nia kylla ïa ka Liang Pyrshah Voice of the People Party (VPP) halor ka kam ïada khyndew, haba bthah ïa kane ka party kaba synshar ha Khasi Hills Autonomous District Council (KHADC) ban pynïadon bynta lang ïa ki Dorbar Shnong, Raid bad Hima ha ka aiñ Khyndew jong ka.
Haba jubab ïa ka jingïatai nia ba lyngkot bala wanrah da u President ka VPP Ardent M Basaiawmoit (Nongkrem), u Conrad ula ong ba ka Sorkar jong u kam ju ïaid lait ïa ki kyndon ba la buh.
“Ka Sorkar ka ju pynneh beit ïa ka jingleh ryntih. Kam pat ju don ka khep ba ngin leh da ka bor ha kano kano ka bynta. Kam pat ju don ka khep ba ngi la ïaid na ka jingkhang dien na ka bynta ban thied jaka. Baroh la leh kat kum ki kyndon ba ïatip lut baroh” ula ong.
U Myntri Rangbah ula ong ba u mynjur bad ki jingkdew u Bah Ardent ba ka jingïasyllok bad ki shnong ki thaw ka long kaba donkam haba shim ïa kano kano ka rai ba ïadei bad ka khyndew ka shyiap, hynrei u ong ba ïa kane ka juh ka nongrim pat la pynkheiñ da ka KHADC kaba synshar da ka VPP.
Haba kynthoh ïa ka KHADC Regulation and Registration of Land (Amendment) Bill, 2026, u Conrad ula ong ba kane ka Bill ka thmu ban weng noh ïa ka kyndon ba kongsan bha-kata ban ïasyllok bad ki Traditional bodies (Dorbar Shnong, Raid, Hima).
“Ka don ka clause ha ka kyndon 16 kaba ong ba ïa ka kyndon 16 jong ka principal act ka kyntien “after prior consultation with respective Dorbar Shnong, Dorbar Raid bad Dorbar Hima, appearing after the word ‘Executive Committee’ shall be deleted” ne “ Hadien ka jingiasyllok bad ki Dorbar Shnong, Dorbar Raid bad Dorbar Hima, hadien ka kyntien “Executive Committee” dei ban pom noh) ula ong.
Haba shim ïa kane ka sienjam kum ka kam kaba sngewsih shibun, u Conrad ula ong “Kane ka iïaid pyrshah pura ïa ka nongrim kaba la pynpaw ha ka jingïatai mynta ka sngi. Ha kawei ka liang ngi ong ba dei ban shim ïa ka jingpynsngew ki Dorbar Shnong, katba ha KHADC pat ïa kane kajuh ka Act la pynkylla bad weng ïa ki Dorbar Shnong, weng ïa ki Raid bad kumjuh ruh ia ki Dorbar Hima na ki kam ïasyllok ha ka kam ïadie ïathied jaka”.
Haba buh jingkylli ïa ka jingleh hok kane ka sienjam, u Conrad ula ong ba ki Dorbar Shnong, Raid bad Hima ki dei kiba la thaw da ki Kpa Tynmen ba kin long kum ki nongpeit bniah bad tehlakam ïa kiei kiei baroh.
“Ki Kpa tynmen ki don ïa katei ka jingïohi jngai, na kata ka daw ngi don ïa ki Rangbah Shnong, ngi don ia ki Raid bad ki Hima ba kin pynthikna ïa ka jingpeit thuh bad tehlakam ïa kiei kiei baroh ha ka rukom synshar khadar tynrai, kaba la ïabud da ki phew snem bad spah snem” ula kynthoh.
Haba pynphai kylla ïa ka jingdawa sha ka VPP, u Conrad ula ong “Namar kata, nga kwah ban buh ïa kane ka jingdawa sha ka VPP. Nga kwah ban buh ïa ka mat jingdawa jong nga sha ka KHADC bad bthah ïa ki ban sngewbha leh ïa kaei kaba phi ïalap bad sngewbha pynïadon bynta lang ïa ki Dorbar Shnong, Raid bad Hima, sngewbha pynthikna ba ki Shnong ki thaw kim dei ban shah ieh shadien”.
Ula ong ba ka Sorkar ka kyrshan pura ïa ka jingïashim bynta lang ki shnong ki thaw ha ki kam jaka puta bad kyntu ïa ka KHADC ba kan bud lang ïa kane.