Shillong, Nailar 25 : U Myntri ka tnad PHE Marcuise N Marak ha ka sngi Ba-ar ula ong ba ka Sorkar Pdeng kala ai 336.62 klur tyngka sha ka Meghalaya hapoh ka JJM 2.0 na ka bynta u snem 2026-27, hynrei ula ong ba ka dang dei tang ka jingmang ym ba la pynlait, naba ïa ka jingpyllait pisa la pynïasnoh bad ka jingpyntreikam pyrrkhing ïa ki kyndon bad jingpyndep ïa ki skhim.
Haba kdew ïa ka shithi mang tyngka ba la ai da ka National Jal jeevan Mission hapoh ka Ministry of Jal Shakti, u Marak ula ïathuh ïa ka ïing Dorbar ba ka jingai pisa ka long 2.36 klur tygnka kum ka bhah ka Sorkar Pdeng na ka bhah ka Jylla na ka bynta ki SVS, 171.46 klur tyngka kum ka jingpynlait lypa shuwa ban pyntrei ïa ka kam na ka bynta ka SVS, MVS bad ki Pipe Water Supply Scheme, 140.78 klur tyngka hapoh ka reimbursement mode ka MVS, 15.73 klur tyngka ban kyrshan ïa kiwei ki kam bad 6.29 klur tyngkaban khmih bniah ïa ka jingkhuid ka um.
Haba pynpaw ba ka Meghalaya kala leh bha ban ïa kiwei, ula ong “Kane ka dei ka jingai pisa na ka bynta ka JJM 2.0 u snem 2026-27. Haba pyrkhat ïa ka 336.62 klur tyngka bala ai bad mang na ka bynta ka Meghalaya, kane ka jingai pisa ka kham bun shah ban ïa kiwei ki Jylla Shatei Lam Mihngi lane ki Jylla lum”.
Ha kajuh ka por, ula maham “dei pat ban sngewthuh ba kane ka dei ka jingmang bad jingai pisa jong ka JJM, ym ka jingpyllait”.
U Marak ula batai ba ka Ministry kan pyllait ïa ka pisa tang hadien bala pyndep ïa baroh ki kyndon bala buh kynthup ka financial audit jong ki arsnem bala leit, thaw ïa ka head of account da u Accountant General bad kiwei kiwei.
U Myntri u ong ba ka jingpynlait pisa kan long hakhmat eh ïa ki skhim kiba la dep ban pyntrei pura.
“Ka jingpynlait pisa kan long shuwa ïa ki skhim bala pyndep 100%, hadien 95-100%, bud sa ka 90-95% bad ter ter. Kumta la kyrpad ïa ki contractor ba kin shim ïa ki sienjam ha ka ban pyndep ïa ki skhim” ong u Marak.
Kane ka jingkren kala mih ruh haba jubab ïa ka jingsngewkhia bala pynpaw da u MLA ka UDP na Nongpoh Bah Mayralborn Syiem uba la pynsngew ïa ka jingduna pisa la arsnem hapoh ka JJM bad ka jingnang kynton ki bill ba khlem pat siew.
