Yn mihkhmat 36 ngut ki nongïalehkai na SWKH District ha ka 41st State Badminton Championship 2026

Mawkyrwat, Nailar 25 : Ki 36 ngut ki nongïalehkai kiba la shah jied ha ka South West Khasi Hills District Badminton Association kin sa leit ban mihkhmat ïa ka South West Khasi Hills District ha ka 41st State Badminton Championship 2026, ka ban sa pynlong naduh ka 26 tarik haduh ka 29 tarik u Nailar, 2026 ha Nongstoiñ, West Khasi Hills District.
Kine ki 36 ngut ki nongïalehkai ki la shah jied hadien ka jingïalehkai bad ka jinglah jong ki ban pyni ïa ki sap ba ki ki don kaba la pynlong dang shen da ka Association, bad kine kin mih mynta ka sngi na la ka jong ka distrik ban leit ïashimbynta ha kane ka lympung ïalehkai Badminton ha Nongbah Nongstoiñ.
Kum ka dak jong ka jingaimynsiem bad kyrkhu kyrdon ïa ki nongïalehkai, ka South West Khasi Hills District Badminton Association ka la pynlong ïa ka jingïalang ba lyngkot ha Hall jong u Block Development Officer, Mawkyrwat C&RD Block.
Ha kane ka jingïalang la donlang u Bah Elbok Wanniang, Vice Chairman jong ka South West Khasi Hills District Badminton Association, u Bah Tidy Wahlang, General Secretary jong ka Association, ryngkat bad kiwei ki nongkitkam jong ka Association, ki kmie ki kpa jong ki nongïalehkai bad ki 36 ngut ki nongïalehkai kiba la shah jied.
Ka Association ka la ai mynsiem bad kitbok kitrwiang ïa baroh ki nongïalehkai, da kaba kyrmen ba kin ïalehkai bha bad kin lah ban pynpaw ïa ki sap bad ki buit ïalehkai jong ki, khnang ban wanrah nam bad burom ïa ka South West Khasi Hills District ha kane ka 41st State Badminton Championship 2026.