Ba shah pynjaboh ka kshaid Daiñthlen, shimkhia u SDO ban khot jingïalang ïa ki nongïalam shnong

Shillong, Nailar 24: U nongtreikam monsngewbha ha kaba ïadei bad ka jingkylla ka suiñbneng u Bah Carmel Fedrick Malngiang dangshen u la kyntu ïa ka ophis Sohra Civil Sub-Division ban tuklar lem mardor ïa ka jingbret jaboh beaiñ, ka jingsait ïa ki kali hapoh ki wah, bad ka jingpynjaboh ïa ka wah Daiñthlen, kaba dei ka tyllong umbam umdih kaba kongsan jong kiba bun ki shnong ha katei ka thaiñ.
Ha ka shithi ba la phah dangshen sha u Sub-Divisional Officer, u Bah Malngiang u la pynpaw ïa ka jingbret jaboh ha Lum Mawkyrdup kaba hab ha ka Hima Sohra, ha kaba u la ong ba la pynlong ïa kane ka thaiñ kaba ym bha ha ka koit ka khiah bad kaba don jingma ïa ka Rait Kteng bad ka wah Daiñthlen bad ki jingjyrngam jong ka.
U la pynpaw ruh ka jingsngewkhia halor ka jingsait ïa ki kali bad ka jingpynlong picnic ha shilynter jong ki wah kiba kynthup ïa ka Umtynghiang bad Daiñthlen, ha kaba u la ong ba ka long ka jingma kaba khraw ïa ka koit ka khia jong ki paidbah.
U Bah Malngiang u la don ruh ka nongmuna jong ka um na ki kor na ka Wahkaliar, kaba dei na ka tyllong im jong ka wah Daiñthlen, kaba la test ha State Food Testing Laboratory ha Shillong ha ka 27 tarik u Jymmang, 2026. Ka kaiphod ka shem jong ka jingdon bun ki khniang micro-organisms ba kynthup ïa ka E. coli, Salmonella, Staphylococcus bad Total Coliform, ha ryngkat ka jingduna ka pH. Ka lab ka la pynbna ba ka um ka long kaba ym bha ban dih khlem ka jingdon ka jingsumar bad pynkhuid.
Na ka liang u Bah Malngiang u la pynpaw ka jingsuba ba kine ki jingjaboh ki dei na ki jaka jngohkai bad ka jingbret jaboh ha shi lynter jong ki rud wah.
Halor kane na ka liang u SDO u la shimkhia bad pynthikna ruh ban shim kam mardor bad ban sa khot ruh ka jingïalang bad ki nongïalam shnong, ki khlieh nongsynshar bad ki shnat kiba dei khmih halor kane ka bynta.
Shuh shuh u Bah Malngiang u la kyrpad ba dei ban khang noh ïa ka jingshah ban khang sait kali bad ka picnic harud jong ki wah, bad ban buh ka jingleit jurip lang ïa ka kshaid Daiñthlen bad ki Sordar, ki Rangbah Shnong, ban shim ki rai kiba neh ban khang ïa ka jingbret jaboh ha u Lum Mawkyrdup. U la kyrpad ruh ïa ki nongshong shnong jong ka thaiñ Sohra ban shimkhia ban ïada ïa ka sawdong sawkun na ka bynta ka bha ka miat jong ki pateng ban wan.