Ha ki san snem kumba 3,085 ngut ki khynnah CwSN ba ïoh ïa ki jingïarap kyrpang ha ka jylla

Shillong, Nailar 23 : Ha ki san snem kiba la leit, ki la don baroh 3,085 ngut ki Khynnah kiba kyrpang (Children with Special Needs – CwSN) ha Meghalaya ki la ïoh jingïarap lyngba ki jingïarap bapher bapher hapoh ka rukom ai jinghikai kaba kynthup lang ïa baroh, la pynpaw ha ka jingïalang buddien kaba la long ha kane ka taiew ba la dep.
La ong ruh ba ha ka thaiñ Shatei-Lam Mihngi baroh kawei, kumba 30,000 ngut ki khynnah kiba Donkam Kyrpang ki la ïoh jingmyntoi ha kajuh ka por.
Ïa kine ki jingtip la pynpaw ha ka Integrated State Review Meeting jong ki District Officers, Special Educators bad District IE Coordinators, kaba la pynlong da ka Artificial Limbs Manufacturing Corporation of India (ALIMCO) ha jingïatreilang bad Samagra Shiksha, Meghalaya ha nongbah Shillong.
Ha ka jingïalang ba la pynïaid da ka State Project Director jong ka Samagra Shiksha, ka Richa Kulkarni la wan ban don lang naduh ki ophisar na ki district, ki nonghikai kyrpang bad ki ophisar ALIMCO ban ïakren halor ki jingeh bad ki bynta kiba dang duna ha ka jingïarap ïa ki CwSN.
Haba kren ha ka jingïalang, ka Kulkarni ka la ong ba donkam ban mih na ka rukom peit kaba pynleit jingmut tang ha ka jingshitom ne ka jingduna jong u khynnah, sha ka rukom kaba peit ïa ka imlang sahlang. Kane ka mut ban pynbeit ïa ka sawdong sawkun, ka rukom ai jinghikai bad ka teknoloji katkum ka jingdonkam jong uwei pa uwei, ym ban peit ïa ka jingduna jong u khynnah kum kaei kaei kaba dei ban “pynbeit”.
Ka la ong ba ka pule puthi kaba long kyllum lang ka donkam ïa ka jingsngewthuh kaba kham bha na ki nonghikai, ki kmie ki kpa bad ka imlang sahlang. Ka la pynpaw ruh ïa ka jingdonkam jong ka jingtip na ki nongtrei ha ki shnong bad ki thaiñ, namar ki tip ïa ka jingim bad ki jingeh ba ki khynnah kiba don ka jingthut ha ka met ki mad man ka sngi.
Ka Kulkarni ka la kdew ruh ïa ki jingeh kiba mih namar ka Meghalaya ka don bun ki jaka kiba eh ban poi bad ka jingduna ha ka digital connectivity, kaba ktah ïa ka jingïarap lyngba ka teknoloji ha ki jaka kiba jngai.
Ka prokram ka la sdang da ka jingkren pdiang na u Sengupta, Unit Head jong ka North-East Region, ALIMCO, uba la pynpaw ïa ka jingaiti jong ka corporation ban pynthikna ïa ka jinglah ban ïoh jingïarap bad ka jingïakynthup lang ïa baroh.
Hadien kata, ka ALIMCO ka la pyni ïa ka jingpynshai kaba bniah halor ki kam bad ki jingïarap kiba ka la pynlong. Hadien kata la don ka jingïakren hapdeng ki nongïashim bynta, ha kaba ki la ïakren halor ki jingeh kiba ïadei bad ka jinglah ban ïoh jingïarap, ki jingïarap kyrpang, ki jingdon jingem, ka jingpynsngewthuh paidbah bad ka jingithuh ïa ki jingdonkam ha ki shnong bad ki thaiñ.
Ka jingïalang ka la pynskhem biang ïa ka jingaiti jong ka ALIMCO bad Samagra Shiksha ban tei ïa ka rukom ai jinghikai kaba lah ban pynbiang ïa ki jingdonkam bad kaba kynthup lang ïa baroh, khamtam ïa ki Khynnah kiba Donkam Kyrpang.