Yn ïamir jingmut ka SACYM ïa ki samla ban ïengskhem ha la ki nongrim, wer sha ka lympung ba 23 ha Mawlasnai

Shillong, Nailar 23: Ka lympung jong ka sengbah kaba 23 ki Samla ka Shillong Archdiocesan Catholic Youth Movement (SACYM) kan pynlong ïa ka jingïakynduh lang ha St. Paul’s Mawlasnai Parish ha ka 7, 8, 9 bad 10 tarik ha u bnai Kyllalyngkot jong u snem 2027.
Ha kane ka jingïakynduh lang kin don ki program bapher bapher bad ki jingïamir jingmut ïa kiba bun ki phang kaba ki khun samla jong ka Balang ki ïakynduh bad mad ha kine ki por kiba mynta.
Haba kren sha ki lad pathai khubor ha ka sngi Saitjaiñ ha Ïing u Archbishop ka Shillong u Youth Director ka SACYM u Rev. Fr Jameris Shylla u la ong ba kane ka lympung yn ïamir jingmut bha halor ki jingeh, ki jingduh jingkyrmen bad kumjuh ruh ba ki samla ki dei ban ïeng skhem ha la ka nongrim bad khamtam eh ban ïakren ïa ki jingmait phang kiba u Kpa Bakhuid u Pope Leo ba 14 kiba u la buh na ka bynta ki samla.
U Rev. Fr Jameris Shylla u la ong ruh ba kane ka jingïalang yn ïatai ïa kiba bun kiwei pat ki phang kiba ïadei bad ka jingieng skhem ki samla ha ka jingngeit bad ki jingduh jingkyrmen haba phai sha baroh ki liang.
Katba u President u samla Eden Marbaniang u la ong ba ha kane ka lympung kin don ki prokram bapher bapher bad kaba sdang kata ha ka 7 tarik kan don ka jingpdiang sngewbha ia ki Deligate bad ki prokram ba la pynkhreh na ka bynta jong ki, katba ha ka 10 tarik pat kan sdang da ka Mass Bakhuid ban pynmynta da u Lyngdoh Sad ka jyllaniambah Shillong u Most Rev. Archbishop Victor Lyngdoh bad kiwei pat ki Lyngdoh sad, ki riewniam bad ka jingïashim bynta lang da ki paid riewngeit bad ban pynbud pat da ka jingïalang ki samla halor ka phang ba la buh bad ka jingmane Sacrament.
Katba u Assistant Youth Director u Rev. Fr. Staibok Warjri u la ïathuh ba kane ka lympung kan kham pher na kiwei pat ki lympung kiba la pynlong ha ki snem ba la dep bad na ka liang jong u ula ïathuh shaphang ka jingpynkhreh ïa kane ka lympung bad kumjuh ruh uba la kren ha ka ktien Garo khnang ba ki samla Garo kiba don ha jyllaniambah Shillong kin tip bad shim bynta.
Na ka liang ka SACYM ka la kyrpad bad iawer lang ïa baroh ki samla ba kin wan ban shim bynta khnang ba kin ïoh ki hikai bad pynsngewthuh halor ki jingeh ba ki mad ha kane ka juk bad kumjuh ruh ban long ki samla ban tei ïa ka lawei ka imlang sahlang bad ka Balang.
Shuh shuh ki la ong ba ha ka prokram jong ki Delegate kan don ka jingthaw ïa ki 8 kynhun ha kaba kin don da ki nongda kaba dei da ki riewkhuid bad kine ki delegate kin leit ban rung sha ki manla ki Balang shnong jong ka Parish Mawlasnai bad kin ïasyllok bad ki paid riewngeit ha kiba bun ki bynta jong ka jingim jong ki ha ki kam Balang bad kiwei kiwei pat ki jingdonkam kaba ki ïakynduh na ka por sha ka por bad ïa kane ka prokram jong ka jingïalang ki khun samla yn pynkut da ka retreat ha u bnai Naiwieng.