Ka Government e Market place (GeM) ka la pawkum ka nongïalam ha ka pyrthei ha kaba ai ïa ka rynsan kaba shai, kaba kynthup lang ïa baroh bad kaba paka na ka bynta ka jingthied mar da ka sorkar, kaba pynïasoh ïa 1.37 lak ngut ki nongthied mar jong ka sorkar bad ki 25 lak ngut ki nongdie bad ki nongpynbiang ïa ki jingshakri.
Ka GeM ka long kaba kyrpang ha kaba pynïasohlang ïa baroh ki kam thied mar ba kongsan ha kawei ka ïew digital kaba heh. Ka pynïasnoh lang ïa ki rukom treikam babha tam ha ka pyrthei bad ka jingpynleit jingmut jong ka sorkar halor ka roi ka par kaba kynthup lang ïa baroh, kaba pynlong ïa ka kum ka kor jong ka jingthmu jong u Myntri Rangbah duh Modi na ka bynta ka Viksit Bharat 2047.
Ha ki shi phew snem naduh ba u Myntri Rangbah duh u la plie paidbah ïa ka sienjam digital kiba wanrah jingkylla ha u snem 2016, ka GeM ka la pynkylla dur ïa ka jingthied mar ka sorkar da kaba pynduh jait ïa ka jingbamsap bad kyntiew ïa ki startup, ki MSME, ki kynthei nongseng kam sengjam bad ki kam khaïi ha ki sorbah kiba rit.
Ka rynsan kaba suk ban pyndonkam kadei ka long kaba la wan bujli ïa ka Directorate General of Supplies and Disposals kaba la budnam, kaba don ïa ki rukom treikam ki bym shai bad ki bym lah ban ïakhun kaba leh shiliang kaba ai jingmyntoi tang katto katne ngut.
Ka long kaba dei eh ba ïa ka ophis ba thymmai, kaba katkum ka juk mynta jong ka Tnad commerce and industry, ka Vanijya Bhawan, la tei ha ka jaka kaba la ju don kane ka jaka treikam kaba la budnam bha.
Kum u Myntri ka Tnat Commerce and Industry, nga sngew sarong ba ka GeM, kaba la sdang ha ka 9 tarik u Nailar, 2016, ka la dap shiphew snem ka jingshakri kaba prat lynti thymmai. Kane kam dei tang u mawmer ban rakhe ïa ki jingdon; kadei ka jingkylla kaba kongsan bad kaba jop ha ka rukom ba ka jingthied mar da ka sorkar ka ai bor ïa ka jingtei ïa ka ri.
Ka jingshai, ka jingsuk ban sdang ïa ka kam
Da kaba pynlong digital ïa baroh ka kam thied mar, naduh ka jinglap ïa ki mar bad ka jingtyrwa dor haduh ka jingai ïa ka contract bad ka jingpyllait jingsiew, ka GeM ka la pynduhnoh ïa ka jingleh shiliang, ka la kyntiew ïa ka jingïakhun kaba shai, bad ka la pynkhlaiñ ïa ka jingshaniah jong ki paidbah. Man la ka jingsiew jingdiah kadei kaba lah ban buddien bad pynshisha, ka kyntiew ïa ka jingkitkhlieh bad pynskhem ïa ka jinglong ba janai jong ka jingthied mar da ka sorkar.
Ka GeM kadei u mawjam jong ka jingthmu jong u Myntri Rangbah duh Modi ban pynsuk ïa ka jingsdang ïa ka kam. Lyngba kawei ka rynsan digital, ka jingpynrung kyrteng kaba suk, ki rukom treikam kiba la pynbeit ryntih bad ki jingpynkylla ïa ki polisi kiba ïai bteng kum ka jingpynsangehnoh ïa ka Caution Money Deposit bad ka jingpynbeit ïa ka dor, ka GeM ka la pynduna shibun ïa ki jingkhang lad ban ïashim bynta bad ka jingplie lad ïa baroh ban ïoh bynta ha ka jingthied mar jong ka sorkar.
Atmanir bhar Bharat
Ka GeM ka la kyntiew ïa ka bynta jong ka jinglah kyrshan dalade bad ki kam Swadeshi. Da kaba buh hakhmat eh ïa ki nongshna bad ki nongpynbiang ïa ki lad jingshakri hapoh ka ri, ka la pynkhlaiñ ïa ki kam ha ki thaiñ bad kyntiew ïa ki mar ba shna hapoh ka ri.
Man la ka jingbthah ba la buh ha ka portal kadei ka jingbei tyngka ha ka jingtbit jong ka India ha ka kam shna tiar bad ka bor ban pynïaid kam dalade ha ka ïoh ka kot. Kaba kham kongsan ka long ba ki Micro and Small Enterprise (MSE) ki don kumba 60% na ki jingbthah katkum ka jingbun bad palat 45% na ka Gross Merchandise Value (GMV) ha ka GeM.
Ka jingthied mar jong ka sorkar kaba ai bynta lang ïa baroh
Ka GeM ka long kum ka kor kaba kongsan jong ka jingroi kaba ryntih katkum ka thong jong u Myntri Rangbah duh Modi ka sabkasaath, sabkavikaas. Ka ai ïa ki startup, ki kam ba rit baria bad ki kam ba la ïalam da ki kynthei ïa ka lynti kaba suk ban pyni ïa ki mar bad ki jingshakri jong ki sha ki nongthied mar jong ka sorkar khlem kano kano ka jingkhanglad ne nong mushlia.
Da kaba pynduh ïa ki jingkhanglad ban rung bad ka jingplie lad ïa baroh ban ïoh bynta ha ka jingthied mar jong ka sorkar, ka GeM ka la ai bor ïa ki kam barit baria ha kylleng ka ri ban long ki nongïatreilang ha ka jingtei ïa ka ri bad ban rung ha ka kam kaba mynshuwa la bun da ki kompeni kiba la skhem.
Palat 12 lak tylli ki Micro bad Small Enterprise ki la pyndep ïa ki order jong ka sorkar kiba shongdor palat T.9 lak klur lyngba ka GeM. Palat 2.20 lak ngut ki kynthei nong sengkam ki la ïoh ïa ki order kiba palat ïa ka T.99,713 klur, katba palat 42,000 tylli ki startup ki la pyndep ïa ki order kiba palat ïa ka T.65,600 klur. Ka GeM ka la plie lad ïa palat 69,000 ngut ki nong sengkam SC/ST ban ïashim bynta ha ka jingthied jong ka sorkar, da kaba pyndep ïa ki order kiba shongdor palat T.23,145 klur.
Ka nongwanrah ïa ka jingkiew shaphrang
Kine ki jingjop ki pynskhem biang ïa ka bynta jong ka GeMm tang kum ka rynsan thied mar jong ka sorkar. Ka long ruh ka nongwanrah ïa ka jingkiew shaphrang jong baroh, ka jingseng kam seng jam bad ka jingpynkupbor ïa ka ïoh ka kot, kaba pynthikna ba man la ka kam kaba dei hok ka ïoh ïa ka lad kaba mar katjuh ban noh synniang sha ka roi ka par jong ka India.
Ha kiba bun ki liang, ka jingïaid lynti jong ka GeM ka pyni ïa ki jingangnud na ka byntaka Viksit Bharat 2047 kaba ïahap bad ka jingthmu jong u Myntri Rangbah duh ïa ka ri India kaba la kiewshaphrang kaba shai, kaba kynthup lang ïa baroh, kaba saiñdur thymmai, bad kaba don ïa ka bor ban pynïaid kam dalade.
Katba ngi dang rung sha ka phew snem kaba ar jong ka GeM, ka jingthmu jong ngi ka long ban pynkylla ïa ka sha ka rynsan kaba khambha, kaba kham khuid, bad kaba la long ka nuksa ïa ka pyrthei kaba pyndonkam ïa ki teknoloji kiba dang mih katba ka pynjylliew ïa ka jingïashimbynta jong kito kiba don bynta ha ka kam, khamtam eh ïa ki nongsaiñdur thymmai jong ngi, ki startup, ki kam barit baria, ki kynthei, ki samla bad ki nongseng kam seng jam na ki sor kiba khamrit bad kiba kham duna ka ïoh ka kot.
Kum kawei na ki rukom thied mar digital kaba jop tam ha India, ka GeM ka ai nuksa kumno ka teknoloji, ka jingpeit bniah ïa ki jingtip, ka artificial intelligence, bad ka jingpynwandur kaba pynshong nongrim ha ki nongpyndonkam ki lah ban pynpoi ïa ka jingsted, ka jingtreikam, bad ka jingïoh ïa ka dor kaba biang haba thied mar ka sorkar. Ha kine ki arsnem mang tyng kaba la dep, ka rynsan ka la tam ïa ka T.5 lak klur ha ka GMV ba man la u snem, ha kaba ka jingkheiñ baroh ka poi sha kumba T.20 lak klur. La pynïar shuh shuh ban kynthup ïa 10,644 tylli ki jait mar bad 350 tylli ki jait jingshakri.
La ka long ki dawai ïada ïa ka jingim bad ki dawai ïada ïa ki jingpang kiba poi kloi sha ki hospital, ka jingpynpoi ïa ki tiar ïada ri bad ki drone, ki tiar kiba bha kiba pynkylla ïa ki kamra pule, lane ki jingdon jingem kiba lah ban shaniah kiba ai bor ïa ki shnong, ka jingthied kaba shai bad kaba paka ka pynthikna ïa ka jingpynpoi kaba khambha ïa ki jingshakri paidbah bad ka jingpyndonkam pura ïa ki jingdon jingem.
Ki nongïoh jingmyntoi ba shisha na kane ka jingkylla ki dei ki nongshong shnong ka India. Ka jingwad bniah jong ka IIT Delhi (Naitung-Nailar 2026) ka lap ba ka jingthied lyngba ka GeM ka la wanrah ïa ka jingmyntoi kaba T.86,571.69 klur ha ki lai snem mang tyngka ba la dep (FY 2023-24 haduh FY 2025-26), kaba kynthup ïa ki jingmyntoi ha ka dor bad ka jingtreikam. Kumjuh ruh, ka jingwad bniah ka la ïanujor ïa 101 tylli ki mar ha ka GeM bad ki juh ki mar ha ki rynsan kum ka Flipkart, Amazon, India mart bad kiwei kiwei. Ka la lap ba ki dor jong ka GeM ki khamduna dor ha ki 74.3% ki mar, bad ka jingtyngkai baroh ka long ~13.6%.
Ka rynsan GeM ka ïeng kum ka kor ba kongsan ha kaba pynïaid ïa ka jingkiew ka ïoh ka kot jong ka India bad ki jingthmu jong u Myntri Rangbah duh na ka bynta ka roi ka par. Ka pynkupbor bad kyntiew ïa kiba duna ka ïoh ka kot ha ka imlang sahlang bad ka kyntiew ïa ka jingseng kam seng jam, katba ka pynthikna ba ïa ka pisa jong ki nongsiew khajna yn pyndonkam hok ban thied ïa ki mar kiba bha ha ka dor kaba jem.
(U nongthoh udei u Myntri Sorkar Pdeng ba dei khmih ïa ka Tnad Commerce and Industry).
