Shillong, Nailar 23: Ka Youth Hostel Association of India (YHAI) Meghalaya State Branch ha ka sngi Saitjaiñ ka la rakhe burom ïa ka jingdap ba 115 snem ban kynmaw burom ïa u Richard Schirrmann u nongseng ïa ka YHAI ha u snem 1912, u ba dei u nonghikai na ri Germany.
Ha kane sngi u Chairman ka YHAI Meghalaya State Branch u bah ED Nongsiang ula pynkynmaw ïa une u riewkhraw uba ïohi jngai ban seng ïa ka Youth Hostel bad mynta la pynïar ïa ki tnad treikam ha kylleng ki ri ka pyrthei.
U la ong ka YHAI Meghalaya State Branch ka ju pynlong man u snem ïa ki National bad local trekking and caving ha jylla Meghalaya ban tip ïa ki jingdon jingem ka mariang bad ula pynshlur ïa ki samla ban ïasoh bad ka YHAI, namar ki lah ban ïoh bun ki jingmyntoi lyngba ki prokram bapher kumjuh ka ïarap shibun ïa kiba leit jingleit sha kiwei ki jylla bad ki ri ban ïoh jaka sah ha ki Youth Hostel ha ka dor kaba jem.
Kiwei pat kiba la ai jingkren kyntu kynpham ki long u bah SL Rapthap, President YHAI Meghalaya State Branch, u bah Fabian Syiem, Treasurer YHAI Meghalaya State Branch, u bah Kynriewbor War bad kiwei.
Ha kane ka sngi ka YHAI ka la pynkup burom ïa u bah Bah Kyntiewbor War bad ka Kong Perisnara Syiemlieh halor u synniang ban hei ba ki la trei khlem tyngkai ban kyntiew ïa ka YHAI ha ki snem ba la dep.
Ïa ka jingïalang la pynphuh pynphieng da ki jingshad bad rwai na ki dkhot ka YHAI Meghalaya state Brach, kynthup ka kynhun tem bad shad na Seiñ Riti Wahkhen na East Khasi Hills Unit, Jezaniah Mawlong, West Khasi Unit bad u samla Iohbor Shadap na Ri Bhoi Unit bad la ioh ban sam khusnam ïa ki nongjop ha ka ïakob thoh essay ba la pynlong shim bynta ka jingrakhe
