Shillong, Nailar 23: Ka jingïakhun kaba tyngeh na ka Langsning ka la pynlong ïa ka ban wanphai na ka shi kol bad ban jop da 3-1 ïa ka Rangdajied United ha ka jingïalehkai ba nyngkong jong ka Round 3 jong ka Shillong Premier League 2026 ha madan First Ground-SSA Stadium ha ka janmiet sngi Saitjaiñ.
U Franky Dkhar (25’) u la thep ïa ka kol kaba nyngkong na ka bynta ka Rangdajied shuwa ba u Mebanshngain Kurkalang (45’+3), u Syed Ahmed (65’) bad u Rohan Manar (88’) kin pynkylla mardor ïa ka jingmih jong ka jingïakhun sha ka jingmyntoi jong ka Langsning, kaba bat ïa ka nam lahduh.
Hashwa kane ka jingïakhun, ka Langsning ka la pynliem ïa ka Sawmer ha ka jingïalehkai ba nyngkong bad nangta ka la mad ïa ka namrem ha ka Meghalaya Police dang shen. Katba ka Rangdajied ka la ïakhaid bad ka MLP bad hadien kata ki la shah rem noh ha ka Sawmer.
Naduh ba sdang ka jingïakhun ka la long kaba jur bha hapdeng kine ki arliang mamla hynrei ka kol ka la urlong tad haduh ka minit kaba 25, ha kaba u Franky u la pynkhihjar na ka bynta ka Rangdajied shuwa ba u Mebanshngain un pynïakhaid ïa ka Langsning ha ki minit pynjlan shuwa ban jam sha ka por shongthait.
Ka Langsning ka la kham pynkhlaiñ ïa ka jingïalehkai ha ka kylla miet hynrei ka Rangdajied kam shym la ailad da kaba suk. Ha kaba kut ka Langsning, kaba bat ïa ka nam lahduh, ka la ïoh ïa ka kol lamkhmat da 2-1 na ka bol pashat kaba thikna jong u Allen L Nongbri, bad u Syed u la pyndep ïa ka kamram da kaba pyndei tiak da ka khlieh ban phah ïa ka bol shapoh kol.
Khlem da hun ïa ka kol lamkhmat kaba duna, ka Langsning ka la ïai bteng ban tur shakhmat bad dei lyngba u Rohan, kaba la pynthikna ïa ka jingjop kaba khlem artatien hadien ba u la pynkhihjar na ka bol pashat jong u Alex Manar.
Ka jingïakhun SPL 2026 ha kane ka sngi Nyngkong kan long hapdeng ka Meghalaya Police pyrshah ïa ka Sawmer ha ka por 3:40 baje nohphai sngi.
