Jowai, Nailar 22: Ka Pamrakmai SCSC ka la jop ïa la ka jong ka jingïalehkai jong ka lympung phutbol Second Division 2026 League Stage bala pynïaid daka East Jaiñtia Hills District Football Association (EJHDFA), ba la long ha ka sngi Saitjaiñ (22 tarik u Nailar, 2026) ha Artificial Ground Diengshynrum, Khliehriat.
Ka shi kol ba la thep da u Heibormi Suchiang haka minit ba 6 jong ka kylla step, ka la paw ba ka la biang ïa ka Pamrakmai ba kan khur ïa ka jingjop pyrshah ïa ka Mukhaialong SCSC.
Shuwa kane, ka jingïakhun kaba nyngkong hapdeng ka Kairang CSC pyrshah ïaka Tuber Kmaishnong ka la kut ha ka jingïakhaid, ha kaba baroh arliang kim shym la lah satia ban pynkhihjar (0-0).
