Lait im ki nongshang suwari ba ngam jyllop ha Wahrew, hynrei khlad pat uba ñiah lieng ba pynkit ïa ki

Shillong, Nailar 22: Ka State Disaster Response Force (SDRF), Meghalaya, ka la pynkutnoh ïa ka jingleit wad kaba jur bha hadien ba ki lap bad ïoh ban sei noh ïa ka met jong u nongñiah lieng ba la 23 snem ka rta uba la ngam jyllop katba u dang pynkit ïa ki laingut ki nong jngohkai pyrthei hapoh ka lieng jong u.
Kine ki 3 ngut ki nong wanjngohkai la ïoh ban pynlait im mardor da ki nongshong shnong hynrei ka long pat kaba sngewsih ba ïa utei u nongñiah lieng ym shym la lah satia ban ïoh pynlait im.
Ïa kane ka jingleit wad la sdang hadien ka jingpyntip ba la ïohpdiang na ka DDMA, East Khasi Hills, haba ïadei bad ka jingjia ngam jyllop hapoh ka Wahrew, Sohbar, bad na ka liang ka kynhun SDRF ki la leit sha katei ka jaka ha ka 20 tarik mynta u bnai, 2026.
Ka kynhun SDRF, ha ryngkat bad ka SRT jong ka Fire & Emergency Services, ki la pynlong ïa ka jingleit wad kaba jur bha ha ka 20 bad 21 tarik mynta u bnai 2026, ha kaba ki la pyndonkam da u RIB bad OBM, ki barbed wire, ki hook bad ki harpoon.
Ha ka por nohphai sngi ha ka 21 tarik, ki rawan nongkhwai doh kiba na ka shnong ki la lap ïa ka jingper jong ka met ha sla um. Kumta ka kynhun SDRF kham hadien, da ka jingïarap ki nongshong shnong bad ki pulit na Bholaganj Outpost, ki la ïoh ban sei noh ïa ka met ïap u nongñiah lieng bad hadien ki la aiti noh sha ki pulit na ka bynta ban leh ïa ki kam katkum ka aiñ.