Mynta dei ban wan noh sa ki tourist taxi na jylla Assam: ASTTA

Shillong, Nailar 21: Ka All Shillong Tourist Taxi Association (ASTTA) ka la pynrem jur ha ka jingkynnoh ba shah pynsangeh bad ka jingshah buh thong ban pynjulor ïa ki kali Tourist na Meghalaya ha Assam hadien ba la mih ka huri hura ha ka 19 tarik mynta u bnai ha Shillong.
U President ka Association u Antholius B. Marak u la pynpaw ka jingbitar halor ki jingioh jingtip ba ki kali na Meghalaya ki la shah pynsangeh bad shah pynjulor ha Jorabat, da kaba ong ba ki nongñiah tourist kiba lui lui kim dei ban shah ne mad ïa ki jingjynjar na kaei kaba la jia ha ka sngi Balang naba kim don jingïadei ne donkti eiei.
U Marak u la ong ba ka association ha kajuh ka por ka pynrem ïa ka jingshah pynjulor ki kali Assam-ha ka por ba pynlong bike Rally ka KSU ha Shillong, hynrei u la pynneh da kaba ong ba ka jingpynphai kylla pyrshah ïa ki nongñiah kali tourist jong ka Meghalaya kam long kaba shonghok ne don hok.
U la pynkynmaw ruh ba ha ki por ba mynshwa haba don jingïakhih ha Assam, ki la don la palat 15 tylli ka Meghalaya ba la kynnoh ba ki la shah pynjulor, hynrei ki tourist taxi association ha Meghalaya kim shym la pynphai kylla pyrshah ïa ki kali kiba na Assam.
U Marak u la buh ka jingkylli ba balei ki nongpynïaid kali tourist taxi na Meghalaya mynta kin shah thombor ne shah kthong haba mih kino kino ki jingïakajia hapdeng kine ki artylli ki jylla.
Shuh shuh u la ong ba ki seng na Meghalaya ki shait shim shwa nyngkong da kaba ïakren ïasuk haba mih ki jingïakajia. Hynrei ha kane ka por kin ym long shuh maki kiba nyngkong ban leit ïakren bad kiba na Assam.
Katkum ka jingong u Marak, lada ki kynhun na Assam ki kwah ban pynbeit ïa kane ka jingeh, kidei ban wan shwa maki ban ïakren khnang ban lah pynbeit ïa kane kam bad ka jingïaid jingïeng ki kali hapdeng kine ki ar jylla kin long biang kumba ju long mynshwa.