EJHDFA 3rd Division: Jop ka Sonapyrdi FSC bad Wahsarang SC, ïakhaid kawei ka jingïakhun

Jowai, Nailar 20: Ka Sonapyrdi FSC bad ka Wahsarang SC ki la jop ïa la ki jong ki jingïalehkai jong ka lympung phutbol Third Division 2026 League Stage, bala pynïaid daka East Jaiñtia Hills District Football Association (EJHDFA), kiba la long hynne ka sngi Palei (20 tarik u Nailar, 2026) ha madan Artificial Diengshynrum, Khliehriat.
Ka Sonapyrdi FSC kala jop da 4-2 kol ïaka Mookympat SSCC ha ka jingïakhun kaba nyngkong. Ha ka jingïakhun dei ka Mookympat SSCC kaba la thep nyngkong lyngba u Ebordame Lamare (8’), hynrei ka Sonapyrdi FSC ka la jubab da kaba pynkhihjar ar sien lyngba u Kerlang Tlang (33’) bad u Kitbok Sutnga (45’) ban lamkhmat ïa ka kylla step. U Affirming Tlang (67’) bad u Rikune Rupsi (75’) ki la bynrap sa ar tylli ki kol ha ka kylla miet shuwa ba ka Mookympat SSCC kan pynphai kawei na u Ritre Lyngdoh (79’).
Haka jingïakhun kaba ar, ka Wahsarang SC kala pynjemkhnap da 4-0 ïa ka Mookhep SCSC, ha kaba u Shawas Dkhar (48 & 61’) u la thep ar kol, katba u Combine Lamo (72’) bad u Evangelist Bareh (73’) ki la thep mar kawei ka kol.
Kawei pat ka jingïalehkai jong kane ka sngi, kata hapdeng ka Musniang Rim SC pyrshah ïa ka Shiborlang SC Pynthorsale, ka la kut noh ha ka jingïakhaid, ha kaba baroh arliang ki la ïa thep mar 1-1 kol.
Ka Shiborlang SC Pynthorsale ka la thep lyngba u Bormi Phawa (21’) hynrei u Lamphrang Dkhar (45’) u la pynïakhaid na ka bynta ka Musniang Rim.