Ha ka jingïaid rally thuk thuk ka KSU shah thang ka kali sorkar, julor bun ki kali bad shah ktah kti ki nongleit nongwan

Shillong, Nailar 19 : Ha ka jingïaid Rally bad rah lama iong ka KSU da ki thuk thuk mynta ka janmiet kaba la sdang naduh ka por 4 baje ha kylleng ki bynta ka nongbah Shillong, la jia bun ki jingjia naduh ka jingshah thang kali sorkar, jingshah pynjulor ki kali sorkar, ki kali kamai kiba na Assam, ki kali ki riew paidbah bad ka jingshah shoh shah ktah kti bun ki nongleit nongwan.
Kiba bun ki kali kiba shah pynjulor bad shah pynpait ki ïit ki dei ki jongka sorkar. Kine ki jingjia ki jia ha ka thaiñ Polo, Barik, Mawlai, RR Colony.
Kane ka jingïaid rally ka KSU ka long halor ka nongrim ba ka sorkar kam shym la leh patiaw halor ka jingbuh por bad jingdawa ka KSU ban pyntreikam ïa ki san tylli ki mat jingdawa jongka .
Kawei ka kali synran ki pulit kaba don u number ML 05 AC 7081 ka la shah pynpait ka ïit. Kawei pat ka dei ka kali jongka ophis National Informatics Centre kaba la shah pynpait ka ïit ba nadien ha Barik,
Kiwei kiwei ki kali ba shah pynapait bad shah pynjulor ki dei AS 01ES 8243, AS 11AH 5190, ML 01 5620 bad ML 01 A 0966. Kawei ka trok pickup kaba don u registration numbner ML 05 AD 0925 bad kawei ka trok jong ka tnad Telecom kaba don u number AS 01P 2707.
Ka kali sorkar kaba dei ka bolero ka la shah wiang ding hajan FCI Mawlai. Ka la don ruh ka jingshah pynpait ka ïit ba la ker ïa u mot dur jong u Swami Vivekananda ha RR Colony. Kawei ka trok ka la shah kawang maw bad pait ka ïit ba nakhmat ha Nongmensong.
Shwa kane ka jingïaid rally da ki thuk thuk ki dkhot ka KSU ki la leit wah ruh ïa ka banner hakhmat Secretariat ha kaba la kynnoh ïa ka sorkar ba ka jur ka jingleh thok ha ka jingthung kam thung jam bad kumjuh ruh ka jingbamsap kaba jur.
Hynrei tang hapoh ki minit ba la dep wah ki pulit ki la weng noh ïa katei ka banner bad pynkhlaiñ ka jingpahra ha Secretariat.
Hakatei ka banner la thoh “ Ngi la minot ha ki jingpule, ngi lah pass hynrei ha kaba kut ïa ka kam la ai tang sha kito kiba lah ban thong pisa”.
Kane ka jingïaid rally ka la sdang hadien ba ki nongïalam ka KSU ki la leit ban pynshai sha ki paidbah ha kylleng ki district kynthup hangne ha nongbah Shillong halor kitei ki san tylli ki mat jingdawa jongka seng.
Kitei ki san tylli ki kynthup ïa ka jingpyndam noh ïaka jingsngap paidbah halor ka Shree Cement kaba la long ha ka 31 tarik Naitung ha East Jaintia Hills da kaba kynnoh ba ka dei kaba la leh thok leh shukor.
Ka seng ka dawa ba dei ban leh ei ei naduh u Deputy Commissioner , U SP, ki Pulit Ophisar katei ka district ki heh jongka Meghalaya State Pollution Control Board namar ka jingïadonkti ban khang ïa ki paidbah ban poi sha katei ka jingngap bad jingbishar paidbah.
Ka seng ka dawa ban pyntreikam pura ïa ka Meghalaya Residentss Safety and Security Act (MRSSA) 2026 tad haduh ban da ïoh ïa ka Inner Line Permit. La dawa ruh ban buh iaki Fecelitation Centre ha ki 18 tylli ki Entry Point ha Khasi bad Jaintia Hills bad ban pynthikna ïa ka jinglong trai shnong tang da ki bor ka Dorbar Shnong.
Ban pyntreikam ruh ïa ka Meghalaya Migrant Workmen Act 2020, ban pynkylla ïa ka rukom thungkam ha NEIGRIHMS da kaba thung ha ka ratio 80:20 kaba mut 80% ki kynthei bad 20 % ki shynrang ha ka kam nurse bad dei ruh ban don bhah kyrpang ïa ki paid Khasi, Jaintia bad Garo. Ban pynduh noh ïa ka personal interview ïa ki post Grade B ,C, D ha baroh ki recruitment board.