Rai ka KSU ban don noh tang ka jingshong kyllaiñ myngor ha ka 21tarik

Shillong, Nailar 19 : Ka Khasi Student’s Union (KSU) ha ka janmiet sngi Balang ka la pynbna ba ki la shim ïa ka rai ba kin don noh tang ka jingshong kyllaiñ myngor ha ka 21tarik mynta u bnai kaban shim bynta tang ki nongïalam jong ka Central Executvie Committee.
Haba kren bad ki lad pathai khubor, u President ka Seng, u Samla Raymond Kharjana u la ong ba ka jingshim jong ki ïa kane ka rai ka dei hadien ba ki la ïohi ïa ki video kiba saphriang hadien ba ka seng ka la dep ban pynlong ïa ka jingïaid paidbah da ki ar shaka ha kane ka janmiet.
“Na ka liang ka Seng ngi dap da ka jingdiaw namar ngi khlem poi pyrkhat ba kan jia kumto,” ong u President da kaba bynrap ba naduh shwa ban sdang ka rally ki la dep bthah lypa ïa ki dkhot ka seng ba kin ïaid da kaba jai jai bad ban ym sangeh ha lynti.
Katkum ka jingong jong u, ki suba ba ki don ki riewshimkabu kiba kwah ban pynthohbrïa ïa ka seng bad ruh ban pynulom noh ïa ki mat jingdawa ba ka seng ka buh hakhmat ka sorkar.
“Na ka liang ka seng ngin wad ïa ki riew shimkabu bad ngi kloi ruh ban treilang bad ki bor distrik halor kane,” ong u General Secretary ka Seng, Samla Rueben Najiar.
La ïathuh ruh ba na ka seng ki la nang mutdur ba kin don tang kumba 80 – 100 tylli ei ei ki scooty hynrei ynda la poi pat ha ka rally ki la ïoh pat ki don haduh kumba 300 tylli ei ei arshaka.
“Paidbah wat thew bad wat weng ïa ka jingkyrshan jong phi tang na ka daw ka jingjia mynta ka sngi. Ngi ruh ngim poi pyrkhat ba kan long kumto namar ngi la pynbeit tang katto katne tylli ki scooty hynrei mynta ki la bun bha. Ngim lah ban ong ïa ki ruh ban nai wan,” u la bynrap biang.
Kumta halor kane, ki nongialam ka seng ki la shim ïa ka rai ban pynsangeh noh ïa ka jingïaid kjat kaba ki la pynbeit ha katei ka 21tarik bad ban don noh da ka jingshong kyllaiñ myngor tang da ki nongïalam ka seng.