Ka jingpynbna jong u Director General of Police (DGP) ka Jylla u Dr. LR Bishnoi ban ïakhun thma bad ban rat dyngkhong pyrshah ïa u drok ka la long ka mat ïatai ha manla ki shnong kiba la shah ktah na ka jingjyllei jong ki nongdih drok. Ka jingjyllei jong u drok ha kine ki snem ba la leit noh ka la pynsngewkhia bha ïa ka tnat Pulit jong ka Jylla namarba kim lah ban ïohkem ïa ki snar khaii hynrei ka jingkem ka long beit tang ïa ki nongdie khutia mutia.
Dang shen, u Dr. Bishnoi u la ïathuh ba ha kane ka jylla Meghalaya ka jingdon jong ki nongpyndonkam ïa u drok ka long haduh 2.5 lak ngut antad ha kaba kine ki kynthup ïa kiba shu injek bad kiba dih da ki dawai.
Namarba ka jingpyndonkam ïa u drok ka kham jur bha ha ki samla, ka tnat Pulit ka la pynlong da ka jingpynsngewthuh paidbah ha kylleng ki skul bad ki kolej ha baroh kawei ka jylla Meghalaya bad kumjuh ruh ha ki shnong ki thaw namarba ka jingjyllei jong ki nongdih drok kam long shuh tang ha ki jaka sor hynrei u drok u la suhthied bha wat sha ki jaka nongkyndong.
Mar ïa shimti ïa ka kam kum u DGP ba thymmai jong ka Jylla, ka tnat Pulit ka la ïoh ban kem ïa ki snar nongkhaii drok na East Jaiñtia Hills District kiba la thmu ban pynpoi ïa u drok sha kane ka nongbah Shillong. Ka jingpeitngor jong ka tnat Pulit ka la wanrah ïa u soh uba jop ha kaba ki snar nongkhaii drok kim don jaka namarba tang shu rung shapoh ka jylla Meghalaya ki ngat beit ha ka shrip jong ki Pulit.
Kiba bun ki longiing longsem kiba don ïa ki khun samla kiba la ngop ha u drok ki ïam kthang bad ki im hapdeng ka jingkhuslai mynsiem namarba kim tip kaei ka ban jia ïa ka lawei jong ki khun ki kti bad ki duwai miet la bad sngi lano ki khun kin lait na une u jingdih pynbuaid.
Namar ka jingjyllei shaba palat jong u drok, ka Directorate of Social Welfare ha u Nailar, 2020 ka la pyllait paidbah ïa ka Meghalaya Drug Abuse Prevention Policy 2020 bad pynbna paidbah ïa ka State Nasha Mukt Bharat Campaign.
Katkum ka jingleh sorjamin, ha Meghalaya ki briew kiba shu injek ïa u drok ki don 11420 ngut. Kane ka jingleh sorjamin kan long na ki 272 District jong ka ri India ha kaba la ithuh kum ki jaka kiba kham jur eh ki briew kiba pyndonkam ïa u drok bad kiba kham jur ka jingdih kyiad.
Dang ha kine ki khyndiat sngi u Dr. Bishnoi u la hiar sha ka shnong Mawlai bad sha ka shnong Madanryting bad Happy Valley ban ïakynduh bad ki nongkitkam shnong khnang ban ïasyllok ha kaba ïadei bad ka jingjyllei shaba palat ka jingdon jong ki nongdih bad ki nong die drok.
Kane kan dei ka sienjam banyngkong eh une u Heh ka tnat Pulit un leit hi da lade sha kine ki shnong ban pan ïa ka jingïatreilang bad ki Dorbar Shnong khnang ban ïakhun thma pyrshah ïa ka jingjyllei jong ki nongdie drok.
Mynta ka shong ha ki Dorbar Shnong kumno ban wad ïa ki lad ki lynti ban weng ïa kane ka jingisaitmet kaba la pyndukha mynsiem ïa kiba bun ki longing longsem.
Ha kiba bun ki khep ka jingshah tuh shah thiem bad ka jingshah tangon ki nongïaid lynti ba luilui la kynnoh ba kine ki jingjia ki wan jia na ka daw ka jingdon jong ki nongdih drok kiba ap kmang tang ban ïoh lute. Ym tang katta, ka jingjur ka jingshah lied ki dukan shnong, ka jingprong tuh ha ki ing briew la kynnoh ba ka dei hi na ka daw ka jingjyllei jong ki nongdih drok kiba im sngi tang ha ka tuh ka lute khnang ban pynhun ïa la ka jong ka met kaba la shah teh mraw bad kiba la im kyrni ha u drok.
Lada ka Jylla Meghalaya kan jyllei da ki samla kiba dang khie dang san kiba la ngop ha u drok shaei ka lawei jong ka jylla kan poi bad ka lawei kaba dum ka la ap lypa.
