Naduh 1 tarik Nailur yn sangeh treikam ki nongshetja Midday Meal ha ka Jylla

Nongstoiñ, Nailar 17: Ka kynhun ki nongshet Ja (Midday Meal) hapoh ka shatri jong ka Union of Cook Cum Helper PM Poshan Meghalaya, ha ka sngi nyngkong ka la pynlong ïa ka Central Executive Committee kum kawei na ki dorbar bah ki Nongshet Ja sngi kiba na ka jylla Meghalaya baroh kawei ban ïathir jingmutlang na ka bynta ki mat kiba don kam jong ka seng.
Ka kong Gina Nengnong President na ka Sengkmie jong ka Union of Cook Cum Helper PM Poshan Meghalaya, ha ka jingïakren bad u nongthoh khubor ka la pynpaw ïa ka jingeh kaba ki nongshet ja ki ïakynduh namar ka jingsiew dor rit palat ka sorkar ïa ki dkhot jong ka seng. Ka la ong ba kat haduh kine ki sngi, ki dang ïoh tang ar hajar tyngka shi bnai, kumta ha kum kane ka juk kaba la kiew dor lut ki jingdonkam ka la shem jingeh ban pyndap na ka bynta ka lut ka sep ha la ïing.
Haba ïadei bad kane, na ka liang ka seng ka la dep ban ai da ka jingthoh sha ki bor kiba halor jong ka sorkar jylla bad ka sorkar kmie. Hynrei kat haduh mynta mynne ka seng kam pat ïoh kano kano ruh ka jubab, namar kata mynta ka sngi hadien ka jingïatai bniah kaba jur ka la mih lang tang kawei ka sur bad kata ka long, ban ïakhih tyngeh da kaba shim ruh ïa ka rai ban sangeh treikam noh shuwa shipor tad haduh ba ka sorkar kan da shimkhia ïa kane ka kam, namar ba ka jingïakhih kaba jai jai haduh mynta ka la kynjoh sha ki 20 snem.
Yn tang katta, hynrei ka seng ka la ong ruh ba lada ka sorkar kan pyrshang ban ai noh sha ki NGO ne kino kino ki seng treimon sngewbha, ban pyntyllun ïa katei ka kam ne ka scheme PM Poshan, ka seng kan ïeng pyrshah da ki jingïakhih kaba tyngeh. Haba ïadei bad kitei ki rai ka seng, ka la ong ba kan sa leit ai da ka jingthoh sha ki bor kiba halor jong ka sorkar jylla Meghalaya bad sha ka sorkar kmie, namar ki mat jingkyrpad ne ki jingïakren ki la ïaid naduh u snem 2019.
La ong shuh shuh ba ka jingsangeh treikam kan sdang naduh ka 1 tarik u Nailur 2026 u ba dei u bnai ban wan tad haduh ba ynda pynbeit biang sa da kumwei, namar lada ka sorkar kan shah skhor kin sdang bteng treikam biang, lym kumta kin kheiñ duh ïa la ka kam namar ym lah shah shuh.
Ha kane ka sngi la ïadonlang ruh u bah Khroo L Pariat Adviser jong ka seng na ka Sengkmie, kong Gina Nengnong President na ka Sengkmie jong ka Union of Cook Cum Helper PM Poshan Meghalaya kaba la pynïaid ruh ïa katei ka jingïalang bad kiwei kiwei.
Ïa katei ka rai la shim da ka jingmynjur lang na baroh ki District bapher bapher kynthup ïa kiba na Ribhoi, Jaiñtia, Khasi Hills bad ruh na kiba na Garo Hills District bad ïa katei ka jingïalang la pynlong ha Dorbar Hall ka shnong Riangdo, Mawshynrut Civil Sub Division, West Khasi Hills District.