Phah tohkit biang ka Katakey Committee ïa ki bor shynshar District SWKH halor ka jingdon ki kharkhana Coke

Shillong, Nailar 17 : Ka Justice Katakey Committee ha ka kaiphod ba 39 jongka ka lap ba ka don ka jingïapher bad jingbym ïadei ka rukom ai jingkheiñ ïa ka jingdon ki Kharkhana Coke ha South West Khasi Hills District (SWKHD). Halor kane ka la bthah ïa ki bor synshar district ba kin tohkit biang halor ka jingdon kine ki karkhana Coke ha katei ka district.
Ka Committee ka la hukum ruh ïa ki bor synshar district ba kin leit tohkit ïa ki karkhana Coke namar ka la don ka jingkynnoh ba kajingtih dewiong beaiñ ka dang bteng beit ha katei ka district.
ïa kane ka jingleit jurip ïa ki karkhana Coke la leit ha ka 1 tarik Jylliew 2026 da ki ophisar ryngkat ka jingdon ki nongpynïaid na kitei ki karkhana.
Kat kum ka kaiphod ba la pynkhreh da u bah B Kharjana MPS bad ai sha u SP bad Deputy Commissioner ba kin phah sha u Secretary ka tnad Mining and Geology ha ka 17 tarik Jylliew 2026.
Kat kum ka kaiphod na ki bor synshar district ki don 10 tylli ki karkhana Coke ha SWKH. Na kine 3 tylli ki bym treikam namar ki khlem ïoh ka jingmynjur na ka Meghalaya State Pollution Control Board (MSPCB). Hynrei kat kum ka jingai jingtip pat na ka MSPCB ha ka jingïalang kaba la long ha ka 29 tarik Jylliew 2026 la pynpaw ba ki don 15 tylli ki karkhana Coke. Na kitei kiba la ïoh CTO ki don 10 tylli bad ki bym pat ïoh ki don 5 tylli.
Ka Committee ka la lap ba ka don ka jingïapher ha ka rukom ai jingkheiñ namar na ki bor district ki ai 10 tylli katba ka MSPCB ka ai 15 tylli bad na kata ka daw la bthah ïa ki bor synshar district ban leit tohkit biang ban lap katno ki karkha Coke kiba la ïoh CTE na ka MSPCB.
Kine ki 7 tylli kiba treikam ki dei jong M/s Sentina, M/s Nimon Enterprise, M/s S.F. Nongbri Enterprise, M/s Phusngi Nongbri Enterprise, M/s Badri Brothers Coke Industry, M/s South West Carbon bad M/s RSS Coke.
Katkum ka kaiphod la pynpaw ruh ba u dewiong uba la pyndonkam da kitei ki karkhana u dei uba la wanrah na shabar ka jylla don pat kiba pyndonkam na uba napoh ka jylla hi.
Ki bor district ki khlem pynshisha la u dewiong uba thied na shabar ka jylla dei kaba la bud ïa ki SoP jong u snem 1024 bad uto uba ïoh napoh ka jylla u dei uba tih da ka jingïoh jingbit ne ba shu tih beaiñ.
Kiwei kiwei ki kharkhana Coke ba la jer kyrteng da ka MSPCB ki dei
M/s Deingngan Enterprise, M/s South West Energy ka CTO ka la kut ha ka 30/11/2025, M/s HRT Coke Oven Plant ka CTO ka la kut ha ka 30/11/2025, M/s Marleki Minerals & Coke Plant ka CTO ka la kut ha ka 30/01/2025, M/s RSS Coke II, M/s Mahasar Industries Pvt Ltd, M/s S.F. Nongbri Enterprise bad M/s HRT Coke.
Ka Committee ka lap ba ki bor district ki khlem ai jingtip sha ka Committee halor kitei ki karkhana. Kumta halor kine ki nongrim la bthah ba dei ban tohkit biang sa shisien halor ka jingdon ki karkhana Coke.