Ka thong ka long kaba shai, ym don ki thaiñ ne ki District ki ban shah ieh shadien: Conrad Sangma

Mawkyrwat, Nailar 17 : Hadien ka jingap khmih lynti kaba lah da ki phew phew snem ban ïoh ïa ka surok kaba bha na Mawkyrwat – Jakrem sha Weiloi, bad mynta ka sngi ka 17 tarik u Nailar, 2026 ka la long ka jingkyrkhu bad jingkmen na ka bynta ki paidbah jong ka South West Khasi Hills District ha kaba u Conrad Sangma uba dei u Myntri Rangbah ka Jylla Meghalaya u la wan ban buh ïa u Mawnongrim ban shna ïa ka surok Weiloi – Jakrem – Mawkyrwat sha Rangthong kaba jngai kumba 40 kilometre ha ka jingmang pisa kaba 140 klur tyngka.
Lah ban kdew ba da kane ka projek ban shna pynbha ïa ka surok Weiloi – Jakrem – Mawkyrwat sha Rangthong kan sa long kawei na ki projek ba don jingkyrkhu kaba khraw ïa ki paidbah nongshong shnong lyngba ka ïaid ka ïeng jong ki bad ban kyntiew ïa ka roi ka par ha ki shnong bad ki dong ki thaiñ baroh.
U Conrad Sangma, Myntri Rangbah ka Jylla Meghalaya haba kren ha ka jingïalang u la ai ka jingïaroh kaba hakhmat eh na ka bynta ka jinglah jong u bah Renikton Lyngdoh Tongkhar u MLA ka Mawkyrwat Constituency namar dei lyngba ka jingpyni bad kdew lynti jong u ïa ki jingdonkam jong ka surok na Weiloi sha Mawkyrwat ha kine snem kiba la dep namar u ïohi ba kane ka surok ka la i donkam shisha.
Kumta u la ong ba ka thong ka long kaba shai – ym don ki thaiñ, ym don ki district ki ban shah ieh shadien bad ka roi ka par ruh ka dei ban sdang na ki jaka kiba kyndong tam bad ban poi sha man ki shnong bad ki thaw ba shna ïa ki surok khnang ba pynsuk ha ka leit ka wan namar ka surok ka dei u bud lum jong ka ïoh ka kot.
Ym tangkata, u la ong ruh ba ki surok kiba bha ki pynsuk ruh ïa ka leit ka wan jong ki paidbah la kiba pang kiba shitom ban poi kham kloi ha ki jaka sumar, ka pynsuk ïa ki bad ai lad ruh ïa ki nongrep ban pynpoi ïa ki mar rep sha ki ïew ki hat bad ki nongsengkam lajong ban pynpoi suk ïa ki mar sha ki ïew ki hat.
Haba kren halor ka jingthmu jong ka Sorkar ban wanrah ïa ka roi ka par kiba ïa ryngkat ha baroh ki bynta jong ka Jylla, u Conrad Sangma u la ong ba ka khana jong ka roi ka par ka Meghalaya ka dei ban kynthup lang ïa baroh ki district, kynthup ruh ïa kiba jngai bad kiba la shah iehnoh mynshwa bad mynta ki la ïoh ïa ka roi ka par kaba biang.
U la pynpaw ruh ba ki district kum ka South West Khasi Hills, South Garo Hills bad East Jaiñtia Hills, kiba mynshwa ki la ju shah ñiew kum ki jaka kiba sha kyndong tam bad kiba dang duna ka jingpynroi, hynrei ha kane ka kynti kaba mynta pat ki la long ki bynta kiba kongsan ha ka jingthmu ban pynpoi ïa ka roi.
“Haba kdew sha ki jingtreikam ha South West Khasi Hills, naduh u snem 2018, ki projek kiba palat T. 850 klur ki la dep pyntrei ha ka district, katba kynthup lang bad ki jingkular kiba dang pynkhreh, ka jingmang pisa ka lajan poi sha ka T. 990 klur”, pynpaw u Conrad Sangma bad kita ki projek ki kynthup ïa ki surok, ki skhim pynpoi umbam umdih, ki jaka pule, ki jaka sumar, ki projek jngohkai pyrthei bad kiwei ki kam pynroi kiba thmu ban kyntiew ïa ka ïoh ka kot bad ka jingim jong ki paidbah.
U la pynpaw ruh ba hapoh kine ki phra snem kiba la leit noh, la lah ban shna palat 3,200 km ki surok ha kylleng ka Jylla Meghalaya, kaba long kumba 1 km ha ka shisngi. Kane ka pyni ïa ka jingkiew sted jong ka jingpyntreikam ha ka jingpynbha bad pynkhlaiñ ïa ka roi ka par hapoh ka Jylla baroh kawei.
Ha kane ka jingbuh ïa u Mawnongrim jong ka surok la don lang ruh u bah Prestone Tynsong uba dei u Symbud Myntri Rangbah ka Jylla Meghalaya kum u Symbud Kongsan, ka kong A.L. Mawlong, IAS, Deputy Commissioner, South West Khasi Hills District, u bah B. Jyrwa, MPS, Superintendent jong ki Pulit ka South West Khasi Hills District, u bah Renikton Lyngdoh Tongkhar, MLA ka Mawkyrwat Constituency, u bah Ollan Sing Suin, MLA ka Mawsynram Constituency, bah Pius Marweiñ, MLA/MDC jong ka Ranikor Constituency, u bah B.M. Syiem, Secretary, PWD (R&B), u Pa’iem Niandro Syiemiong, Syiem jong Maharam Syiemship, lem bad kiwei de ki ophisar sorkar, ki paidbah na kylleng ki shnong kiba la wan sakhi ha kane ka sngi.