Pynbiang da kawei pat ka jaka kaba biang shwa ban pynkynriah ïa ki nongdie madan: A.L.Hek

Shillong, Nailar 17 : U MLA ka Pynthorumkhrah, Bah AL Hek ha ka sngi Nyngkong u la ai ka jingkyrshan ïa ka jingpynkynriah ïa ki nongdie madan kaba dang ïaid mynta ha Shillong, hynrei u la kyntu ïa ka sorkar ban pynbiang shwa ïa ki jaka die kaba biang ha kawei pat ka jaka shwa ban pynkynriah ïa ki.
Haba ai jingïaroh ïa ka kam ba ka sorkar ka la leh ha Polo, kaba hap hapoh ka constituency jong u,na ka liang u Bah Hek u la ong ba ka tnat Urban Affairs ka la pynbha ïa katei ka jaka.
“Lada ngi kren shaphang Polo, ki la leh ïa ka kam kaba bha shisha. Nga ai jingïaroh ïa u Myntri ka Urban Affairs bad ïa ka kynhun jong u. Mynshwa,ka jaka marjan bad ka JN Stadium ka la long kaba sniew dur bha. Hynrei mynta hadien ba la pynkynriah ïa ki, ki la ïoh ïa ka jaka kaba biang ban bteng ïa ka kam khaiï jong ki,” u la ong haba kren bad ki lad pathai khubor.
Une u MLA ba dei ruh u Myntri barim ka sorkar jylla u la ong ba ka jingpynkynriah ïa ki nongdie madan ka dei ban long kylleng bad kam dei satia ban long tang ha kawei ka jaka.
Shuh shuh u la ong ba kadei ka kamram jong ka sorkar jylla ban peit ba ka jingpynitynnad ïa ka nongbah ka dei ban ïaid ryngkat ryngkat bad ka jingïoh kamai jong ki nongshong shnong.
“Ka la dei ka por ban don ki surok kiba kylluid hynrei ha kajuh ka por, kane ka dei ka kam kaba ïadei bad ka jingïoh kamai jakpoh jong ki briew man ka sngi. Lada phi pynkynriah ïa ki kynsan khlem ka jaka bujli kaba biang, kumno ki longïing kin im? Kan long kaba eh shisha,” u la bynrap biang.
Da kaba kdew sha ka kam kaba u la leh ha Golflink na ka bynta ki nongdie madan, u Bah Hek u la ong ba ïa kane ka rukom lah ban pyntreikam ruh ha kiwei pat ki jaka.