Ka bynta kaba bud jong ki jingpynkylla na ka bynta ban pynkhlaiñ ïa ka kam MSME :Da u Jitan Ram Manjhi

By Mawphor Editor On Aug 18, 2026

Ka jingmynjur ïa ka Micro, Small and Medium Enterprises Development (Amendment) Bill, 2026 da baroh artylli ki ïingdorbar thaw aiñ jong ka Parliament, kadei ka sienjam kaba kongsan ban wanrah ïa ka aiñ jong ka India na ka bynta ki MSME katkum ka jingkylla stet jong ka kam. Ha kine ki arphew snem ba la leitnoh naduh ba la pynmih ïa ka aiñ banyngkong, da ki million tylli ki karkhana ki la rung ha ka ïoh ka kot kaba la pynskhem bad ki MSME ki la kylla long ki nongnoh synniang kiba kongsan ha ka jingkiew shaphrang jong ka Ri, ka jingshalan mar shabar ri bad ka jingpynmih ïa ki lad ïoh kam ïoh jam.
Ka jingpynkylla ka ïaleh ban pynlong ïa ka MSME kaba khamlah ban shimkhia bad kaba lah ban shaniah. Ka pynlong ïa ka jingpynrung kyrteng kaba suk, ka jingpynsuk ïa ka jingbuh kyrdan, ka jinglah ban ïoh ïa ka ram bad ka jingsiew ha ka por kaba biang, ka jingpynbeit ïa ki jingïakynad lyngba ki lad digital bad kaba stet bad ka jingbud ryntih kaba kham duna ka jingeh.
Ka jingpynkylla ka ai ïa ka rynsan digital ha ka ri baroh kawei na ka bynta ban ka jingpynrung kyrteng khlem jingsiew bad katkum ka mon la jong ïa ki karkhana. Kane kan weng ïa ki jingkhanglad bad kan ïarap ruh ïa ka Sorkar ban pynpoi khambha ïa ki jingmyntoi. Ka jingpynrung kyrteng katkum ka aiñ ka dei ka hok, kaba ka kompeni ka lah ban kam, ym ka jingkitkhlieh.
Ka jingpynkylla ka ai ruh ïa ka rukom treikam kaba shai na ka bynta ban pynïapher ïa ki karkhana, halor ka nongrim jong ki kyndon ba la kynthup lang jong ka jingbei tyngka ha ki karkhana bad ki mashin lane ki tiar bad ka jingmih. Ka ailad ïa ka rukom pynïabynta ban trei kham kloi ïa ki jingkylla ha ka teknoloji, ka jinglut, ki ïew bad ki rukom treikam bad ka ai bor ïa ka Sorkar Pdeng ban buh ïa ki pud da kaba pynbna.
Na ka bynta kiba bun ki MSME, ka jingeh kaba kongsan ka long ka jingwan ka pisa man ka por. Ka invoice bym pat siew na ka bynta ka kam barit ka don ka jingktah kaba khraw kum ka jingsiew tulop ha ka por sha ki nongtrei, ka jingthied ïa ki mar, ka jingpdiang ïa ka jingbthah kaba bud. Kumta, ka jingpynslem ban siew ka lah ban khanglad shibun ïa ka bor jong ka kompeni ban treikam bad ban kiew shaphrang. Kane ka jingpynkylla ka la pynbeit ha ki lai tylli ki sienjam – ban ïada, ban pynbeit bad ban pyntreikam.
Ka jingïada: Ka wanrah ïa ka jingshai da kaba bthah ban pynbeit bad pyni ïa ki jingsiew ba ïadei bad ki MSME lyngba ka TReDS na ka bynta ki Central Public Sector Enterprise (CPSE). Ki Sorkar Jylla ki lah ban pynjlan ïa kajuh ka jingbthah sha ki State Public Sector Enterprise. Kum ka rynsan dijital ba ïaid katkum ki kyndon jong ka RBI, ka TReDS ka plie lad ïa ka jingsiew ba la pdiang ban bei tyngka da ki bank bad kiwei kiwei ki nongbei tyngka. Ka ailad ïa u nongpynbiang mar ban ïoh ïa ka jingsiew mardor, katba u nongthied u pynbeit bad ka bank ne u nongbei tyngka ha ka tarik ba la buh.
Ka jingsiew kaba dei ban ïoh ka long ka lad jong ka pisa na ka bynta u nongpynbiang mar, kaba ai ïa ka kompeni ïa ka jinglong kaba kham laitluid ban pynïaid ïa ki kam, ban siew ïa ki bill jong ka bad ban ïoh ïa ka jingkiew shaphrang.
Ka jingpynbeit: Ka pynkhlaiñ shuh shuh ïa ka rukom pynbeit jong ka Aiñ ïa ki jingïakynad. Ka ïarap ïa ki Sorkar Jylla ban wanrah shuh shuh ïa ki Micro bad Small Enterprise Facilitation Council na ka bynta ka jingpynïasuk bad jingpynbeit. Ka buh ruh ïa ki por na ka bynta ka jingpynïasuk bad jingpynbeit bad ka ai ïa ka jingithuh katkum ka aiñ ïa ka jingpynbeit ïa ki jingïakynad lyngba ki lad online. Kane kan ïalam sha ka jingpyndep kaba khamstet ïa ki mukotduma bad kan wanrah ïa ka rukom ha kaba, ka kompeni ka lah ban bud ïa ka jingkam kaba dei hok da kaba thikna shaphang ka rukom treikam bad ki por.
Ka jingpyntreikam: Ïa ka jingai da ki Facilitation Council lah ban ïoh biang kum ka jingsiew jong ka khajna jaka. U nongthied uba kwah ban ïakhun pyrshah ïa ka jingai u dei ban thep hynñiewphew-san percent na ka pisa ha ka Kashari bad lada kata ka jingpyrshah ka dang sahteng haduh hynriew bnai, ka Kashari ka lah ban pyllait shiteng na ka pisa ba la ai sha u nong pynbiang mar na kata ka pisa ba la buh. Kumta, ki jingkam kiba dei hok kin ym shah kyntait da ka jingmudui kaba slem bad ka por ba la pynlut ha ka Kashari kan ym long shuh tang ha ka liang jong u nongthied.
Ka jingpynkylla ka pyni ruh ïa ka jingkylla sha ka rukom treikam kaba kham ryntih bad kaba shaniah ha ka jingbud ryntih na ka bynta ki karkhana. Ka jingpynkheiñ kaba rit mynta ka ïalam sha ka jingmaham ha ka sien kaba nyngkong, da ki jingpynshitom pisa ba la buh kyrdan tang lada ka jia biang. Da kaba pynlong ïa ki jingbud ryntih kiba khamlah ban tip lypa bad kiba kham duna ka jingeh, ki kompeni mynta ki lah ban pynleit jingmut ïa ki bor jong ki ha kaba tei bad pynroi ïa ka kam jong ki. Kane ka kyntiew ïa ka jingsuk ban leh ïa ka kam bad ka jingsynshar kaba pynshong nongrim ha ka jingshaniah.
Ha kaba kut, kane ka jingpynkylla ka dei ka dak jong ka jingshaniah ha ki kam micro, small bad medium enterprise ka ban pynkhlaiñ shuh shuh ïa ki ba kin saiñdur thymmai, wanrah ïa ki kam, rung sha ki ïew bathymmai bad lah ban ïakhun. Ka kam MSME kaba kham khlaiñ kan long kaba rah shakhmat ïa ki thong Viksit Bharat.