Ioh jingïaroh ka GHADC ba pynkylla ïa ki kyndon elekshon, kane kan ïada ïa ka hok tynrai: CM

Shillong, Nailar 13 : U Myntri Rangbah ka Meghalaya, Conrad K Sangma, ha ka sngi Palei u la ong ba ka jingpynkylla ïa ki kyndon election jong ka Garo Hills Autonomous District Council (GHADC) ka dei ka sienjam kaba kongsan ban ïada ïa ka jinglong trai ri bad ki hok jong ka Jaidbynriew Riewlum (Scheduled Tribe) jong ka Meghalaya.
Haba kren bad ki lad pathai khubor, ka GHADC ka la pynkylla ïa ki Rule 128 bad 129 ha ka 10 tarik Nailar, da kaba pynlong ïa kawei ka electoral roll kaba kyrpang na ka bynta ka election jong ka Council. Katkum kine ki jingpynkylla, tang ki nongshong shnong kiba dei ki Scheduled Tribe jong ka Meghalaya kin lah ban thep vote ha ka election sha GHADC.
Haba kren halor kane ka jingpynkylla, u Sangma u la ong, “Kane ka dei ka sienjam kaba kongsan bha namar kane kan pynlong ïa ka electoral roll kaba kyrpang na ka bynta ka GHADC.”
Nangta u la bynrap da kaba ong ba de tang ki nongshong shnong kiba dei ki Scheduled Tribe jong ka Meghalaya kin lah ban thep vote ha ka election GHADC.
U Sangma u la pynpaw ba ka jingpynkylla ïa ki kyndon ka GHADC ka long ka sienjam kaba kongsan ha ka jingpyrshang ban ïada ïa ka jinglong kyrpang bad ki hok jong ki paidbah riewlum jong Meghalaya.