Shillong, Nailar 12 : U Myntri ka tnad ka koit ka khiah ka sorkar jylla u Bah Wailadmiki Shylla, u la ong ba haduh mynta ka sorkar kam pat ïoh pdiang ïa kano kano ka jingujor da jingthoh shaphang ka jingdon ki jingpang kiba ïadei bad ka jingeh ban ring bad pynhiar mysiem ha Byrnihat namar ka jingjaboh ka lyer.
Haba kren bad ki lad pathai khubor, u Myntri u la ong, “Haduh mynta, ngim pat ïoh pdiang ïa kano kano ka jingujor da ka jingthoh. Namarkata, kumba nga la ong mynshwa, tad haduh ba ngin ïoh ïa ka jingujor, ngin ym lah ban shim rai halor kane.”
Ha kajuh ka por, u Commissioner and Secretary ka tnat ka koit ka khiah ka Sorkar Meghalaya, u Dr Joram Beda u la pynshai ba ka mat kaba ïadei bad ka jingjaboh ka lyer ha Byrnihat ka dang don hapoh ka jingïakren bad ka ïingbishar.
