SHILLONG, Nailar 12: Ka Mawpat SC, ka PFR FA bad ka Marbisu SC ki la jop ïa la ki jong ki jingïalehkai jong ka lympung Second Division Football League 2026 ba la pynïaid da ka Shillong Sports Association, kiba la long hynne ka sngi Balang ha Polo.
Napdeng kine ki lai kynhun kiba la mad ïa ka jingjop, ka PFR FA kadei kaba la jop bun kol tam, da kaba pynjemkhnap da 6-2 kol ïa ka Lumshyiap SC, katba ka Mawpat SC ka la jop da 2-0 ïa ka Madan S&CC, bad ka Marbisu SC ka la jop salit da tang 1-0 ïa ka Nongrah SC.
Ha MFA Ground, u Peter Lamare (49 & 68’) bad u Refielostar Nongkynrih (79 & 90+4’) ki la pynkhihjar mar ar sien na ka bynta ka PFR FA, katba u Pynshngain Mujai (23’) bad u Frankystar Shabong (58’) ki la bynrap mar kawei. Ha kawei ka liang, ki ar kol jong ka Lumshyiap la thep da u Brandon Lyngdoh (57’) bad u Damanki Syngkli (89’).
Ha kajuh ka por, ka jingïakhun ha SSA Ground la sakhi ïa ka Mawpat kaba la pynliem da 2-0 ïa ka Madan S&CC, bad ïa kine ki kol la thep da u Donboklang Lyngdoh (67’) bad u Oliver Pale (73’).
Ha ka jingïalehkai ba khatduh ha SSA Ground, ka shi kol ba la thep da u Nicholas Swer (39’) ka la biang ïa ka Marbisu ba kan mad ïa ka jingjop pyrshah ïa ka Nongrah.
