La pyllait ïa kiba shna Homestay na ka building permission

Shillong, Nailar 12: Ka tnad jngohkai pyrthei jong ka Jylla Meghalaya ka la pyllait ïa ki nongïoh jingmyntoi hapoh ka skhim jong u Chief Minister’s Meghalaya Homestay Mission Scheme (CMMHMS) ban ïoh building permission na ka KHADC, GHADC, JHADC lane na ka MUDA na ka bynta ban ai ïa ki ram ba la mynjur hapoh kane ka scheme.
Ka hukum ba la pynmih da ka Meghalaya Tourism Department, ka la ong ba ïa kane ka jingpyllait la ai da kaba buh ha ka jingmut ba kane ka skhim ka thmu ïa ki samla trai ri ki bym don kam don jam, ki nongshong shnong bad kiwei kiwei ki nongïoh jingmyntoi kiba donkam ïa ka jingkyrshan jong ka sorkar bad ki tnat treikam ban thaw ïa ki lad kamai, ki kam bad ka ïoh ka kot.
Ka tnad jngohkai pyrthei ka la pynmih ïa ka hukum ban pynsuk ïa ka jingpyntrei kam ïa katei ka skhim, kaba thmu ban kyrshan ïa ki nongioh jingmyntoi na ka thain, khamtam ïa ki samla bym don kam don jam bad ki nongshong shnong ha ka thain nongkyndong, ha kaba thaw ïa ki lad kamai lyngba ki homestay.
Ïa kane ka hukum la pynmih da u Bah C.S. Khongwir, Joint Secretary ka tnad jngohkai pyrthei jong ka sorkar Meghalaya, bad la pynpoi sha u Director ka Tourism, baroh ki Deputy Commissioners, sha u Chairman jong ka Meghalaya Rural Bank bad ki ophisar jong ka tnad jngohkai pyrthei ban ioh jingtip bad leh ïa kaba donkam.