Shillong, Nailar 11 : U Myntri Rangbah ka Jylla Conrad K Sangma ha ka Lah Sngi U Blei , ula ïakynduh ia ka Myntri Pla Tyngka ka Sorkar Pdeng ka Nirmala Sitharaman bad u Myntri Kynnah ka Ayush u Prataprao Jadhav ha New Delhi ban ïakren ia ka jingbei tyngka ïa ki jingtei ka koit ka khiah ha Jylla.
Haba thoh ha X, u Myntri Rangbah ula pyntip ba ka jingïakynduh bad ka Sitharaman ka long kaba sngewtynnad bad seisoh bha.
Ula pynsngew ïa artylli ki kam kiba kongsan : u pud ban shim ïa ki Externally Aided Project na ka bynta ki Jylla ka thaiñ Shatei Lam Mihngi bad shah ïa ki Jylla ba kin pynneh ïa ka excharge rate ba ïoh na ki EAP ba dang treikam mynta.
“Sngewnguh ia ka jingshah skhor jong ka Myntri pla tyngka bad ka jingbteng ban kyrshan ïa ka Meghalaya bad ki jylla Shatei Lam Mihngi” ula thoh.
Hadien kane, u Myntri Rangbah ula ïakynduh ïa u Prataprao Jadhav ban ïakren halor ka jingpynheh ïa ka North Eastern Institute of Ayurveda and Homoeopathy ha Shillong.
Ula ong ba ka jingpynheh kan ïarap ban pynlong ïa ka Meghalaya kum ka regional hub ïa ka pule dangle halor ka AYUSH, jingwad bniah bad jingsumar, bad kyntu ïa u Myntri ba un pynkloi noh ïa ki kam.
