Shongshit ka jingïakob siat khnam ka Archery Association of Meghalaya AAM, poi haduh 186 ngut ki nongsiat khnam

Shillong, Nailar 11 : Ka jingïakob siat khnam ha ka jylla ba tip kum ka Meghalaya State Archery Championship ba la pynlong da ka Archery Association of Meghalaya (AAM) ka la khring haduh kumba 186 ngut ki nongshim bynta na kylleng ki bynta jong ka jylla kynthup naduh ki khynnah kynthei haduh ki khynnah shynrang.
Kane ka lympung ïakob ba lai sngi ka la sdang ha kane ka sngi Ba-ar ha madan madan siat khnam jong SAI, STC, NEHU da ka jingïatrei lang bad ka Directorate of Sports & Youth Affairs ka sorkar jylla.
Ïa kane ka lympung ïalehkai la wan ban plie da ka Secretary jong ka tnat Sports & Youth Affairs ka sorkar jylla, Kong Isawanda Laloo (IAS) ryngkat ka jingdonlang ka Adviser jong ka AAM Kong Matsiewdor Warnongbri (IAS), nangta u General Secretary ka Meghaya State Olmpic Association Bah Finely L. Pariat, President bad Secretary ka AAM bah P.B War Nongbri, Secretary bah Robinson Ryntathiang nalor kiwei kiwei.
Shwa ka jingïalang plie ka la don ruh ka jingpynïakhun ïa ka Qualification Indian Round ka kyrdan ïalehkai Sub Junior kynthei bad shynrang bad hadien ka jingïalang plie la pynbud pat da ka jingpynïakhun ïa ka Individual Elimination Kynthei bad Shynrang (Indian Round ) Sub Junior.
Haba kren kum ka Kongsan, ka Kong Isawanda Laloo ka la ïathuh ba mynta ka sorkar jylla bad ki synjuk ïalehkai ki la don hapdeng ka jingpynkhreh naka bynta ka 39th National Games kaban long ha u snem u ban wan.
Haba phai sha ki mawmer ka AAM, Ka Kong Isawanda ka la pyrto ïa ka jingsdang ban kiew jong kane ka jingïalehkai hadien ba ki nongïalehkai ka jylla ki la lah ban khur ïa ki artylli ki takma ksiar na na 1st Khelo India Tribal Games bad pynpaw ruh ïa ka jingpynkhreh da ka sorkar jylla ban tei ïa ki artylli ki shlem sain dur ba kyrpang (Centres of Excellence) kawei ha ri lum Garo bad ri lum Khasi-Jaintia.
Katba na ka liang nongaibuit jong ka AAM kong Matsiewdor War Nongbri (IAS), ka la pynpaw ba ka lympungbah ïalehkai Senior National Archery Championship kan sa wan ba kan long hangne hapoh ka jylla mynta ka snem.
Nalor katta ka la pynkynmaw ba kumno ba kane ka jingïalehkai kaba la rim tam ha ka pyrthei, kaba haduh mynta mynne la lah ban ïai pynim bad tei tad ha ki spah snem kiba kham shadien ba la ithuh pura ïa ka kum ka jingïalehkai da ka International Olympic Committee ha ki snem 1960.
Haba phai pat sha la ka jong ka jylla, u nongpynim bad ba pynneh ïa kane ka jingïalehkai dei u Bah Woodward Sohliya (bam kwai ha dwar U Blei) bad u nongsain dur ïa ka Indian Round.
Na ka liang kong Matsiewdor, ka la ai khublei ïa u Myntri Rangbah ka jylla u Conrad K Sangma bad kumjuh ïa u Myntri ba dei khmih ïa ka tnat Sports Sports and Youth Affairs, kiba la ailad ïa ka AAM ba kan lah ba kan don mynta, nangta ïa ki coach kiba kynsai bad kumjuh ïa ki performance director khamtam ban ïoh ban thied ïa ki tiar ïalehkai kum shi bynta ka jingpynkhreh na ka bynta ka National Games.