Hadien artaïew ka jingwad kaba jur la lap bad ïoh wanphai ïing biang u Bah Kwis

Shillong, Nailar 10 : U Bah Kwis Sumer na ka shnong Muktapur West Jaintia Hills, u ba la jah rngai naduh ka 15 tarik Naitung 2026, hadien ka jingleit sha Karnataka ban wad kam, la lap pat ïa u bad wan ïalam biang sha Meghalaya ha ka sngi Nyngkong hadien ka jingwad ba khlem sangeh mynta la artaiew da ka jingiatreilang hapdeng ki Pulit ka Meghalaya, Karnataka bad kiwei kiwei ki kynhun.
Ïa kane ka kam la pyntip sha ka Sorkar Meghalaya hadien ka jingaiti ïa ka dorkhas ha ka 27 tarik Naitung 2026. Kumta mardor na ka liang u Myntri Rangbah ka Jylla Conrad K Sangma, ula shimkhia ban ïakren mar mar bad ka Sorkar Karnataka, kaba la pynsted ïa ka jingïatreilang hapdeng ki ar jylla bad ka jingpyndonkam ïa ki agency bapher bapher ban lapdien ïa u Bah Kwis.
Mardor, ka kynhun ki Pulit na Meghalaya ba ïalam da u Lovish Garh, IPS, kala hiar sha Bengaluru ha ryngkat ki nongmihkhmat ka Kur jong u Bah Sumer bad ka la ïatreilang bad ki Heh Pulit ka Jylla Karnataka, kynthup u DGP bad IGP, DIG (A) Bah Ïada Martin Marbaniang, IPS lem bad ki Superintendent of Police. Ka kynhun kala ïashong jingïalang bad ki Pulit ka Karnataka ban pynwandur biang ïa ka ïaid ka ieng u Bah Sumer na ka jaka ba tip khatduh bad kila lah ban lap ïa ka jaka ba u don lyngba ki kor bad ki jingtohkit.
Ïa u Bah Sumer la lapdien hadien ka jingpyrshang jong u ban ïakren bad ki bahaiing lyngba ki social media da ka jingïarap u Kavi Kumar, u ba la ai jaka sah bad jingkyrshan ïa u. Haba shimkhia mardor ïa kane ka jingtip, ki Pulit ka Jylla ha ryngkat ki Pulit ka Karnataka, kila lah ban lapdien bad shem ïa u. Katkum ka kyrwoh la ïathuh shuh shuh ba ïa u Bah Kwis la shem ba u don hapdeng ka jingshngain ha Tiptur, kaba hap hapoh ka Tunkum Distrct, kumta mardor la ïalam noh ïa u da ki bor ba dei peit.
Hadien kane, la pynbeit ruh ïa baroh ki jingdonkam ban wan ïalam biang ïa u sha Meghalaya bad sa shisien pat u la lah ban ïa kynduh bad ïa shem biang bad ki bahaiing hasem.
Ynda la poi ha Shillong ïa u Bah Kwis la pdiang sngewbha da ki bahaiing bad ki Kur bad la ïalam noh ïa u sha la ka jong ka Iing ha shnong Muktapur.
Halor kane, na ka liang u Bah Kwis u la pynpaw ïa ka jingsngewnguh ia u Myntri Rangbah namar ka jingshimkhia jong u haduh ba un da ïoh wanphai suk sha la iing. Ïa kane kajuh ka sur la pynpaw ruh da ki bahaiing hasem bad ka kur.
Ha ka kyrwoh, u Myntri Rangbah ula ong, “Da ka jingïarap ki Pulit ka Karnataka khamtam ki Pulit ka Bangalore bad ka jingtrei shitom ki Pulit ka Meghalaya bad kiwei ki kynhun, ngi la lah ban lap pat ïa u. U la wan poi suk mynta sha ka Jylla jong ngi bad nga shim ïa kane ka kabu sa shisien ban ai khublei ïa baroh kila shim ïa ka bynta, khamtam ki Pulit ha Bangalore bad ka Meghalaya kiba la pynthikna ha kaban shem ia u bad wan ïalam pat ïa u sha la ka jong ka Jylla”.
U Myntri Rangbah u buh ha ka record ïa ka jingsngewnguh kaba khraw ïa ki Pulit ka Karnataka namar ka jingshimkhia mardor ban ai ka jingïatreilang bad ka jingïarap, ka kynhun ki Pulit ka Meghalaya ïa ka jingtrei shitom jong ki, ki kynhun trei mon sngewbha kiba la ai ka jingkyrshan ha ka jingwad ïa une u rangbah. U la ai khublei ruh ïa u Dr. DRL Nonglait uba la shimkhia ban ai jingtip sha ka Ophis u Chief Minister, u Kavi Kumar, uba la ai jaka sah bad jingïarap ïa u Bah Kwis, kaba la pynthikna ïa ka jingshngain bad jinglah jong u ban ïakren bad la ki bahaiing.