ïakynduh Principal ka KSU : Bymdon ka subjek Khasi ha skul Bengali Boy and Girl Laban bad dawa dei ba pynrung

Shillong, Nailar 10: Ka KSU ka shnat Laban Circle lyngba ka tnad treikam ba peit ïa ka pule puthi hapoh ka jingïalam u shongknor u samla K. Nelson Wanrap bad u Secretary u samla Andrew P. Kharbithai ha ka sngi Nyngkong ki la ïoh ban wan kynduh ïa ki principal jong ar tylli ki skul ka Laban Bengalee Boys Higher Secondary School bad Laban Bengalee Girls Higher Secondary School.
Ha kane ka jingïakynduh ïa ki principal jong kitei ki ar tylli ki jaka pule kila dawa ba dei ban pynrung noh ïa ka subjek Khasi ha kine ki skul, ka seng ka la leit ban buh ïa kane ka jingdawa ka long ba hadien ba ki la ïoh ïa ka jingujor na ki kmie ki kpa ba kam don ka subjek khasi ha kine ki ar tylli ki skul kaba dei ka ktien trai ka jylla.
Kine ki ar tylli ki skul ki la don ha katei ka thaiñ Laban mynta la palat shispah snem, hynrei kine ki skul kim shym la pynrung ïa ka ktien Khasi kumta ka seng ka dawa ba dei ban pynrung ïa ka ktien Khasi khnang ba ki samla kiba pule ha kine ki skul kin ïoh jingmyntoi.
Ban shu pynkynmaw ba kane kam dei ka sien kaba nyngkong ba ka seng ka leit mih bad dawa ban pynkynthup noh ïa ka subjek Khasi ha ki skul. Ka Kyrwoh na ka liang u shongknor ka tnad pule u dawa ba baroh ki skul kiba don ha ka dong ka thaiñ Laban hi baroh kawei ki bym don ïa ka subjet Khasi ki dei ban pynrung noh ïa ha ki skul ki jong ki na ka bynta jong ki samla Khasi kiba kwah bad sngew donkam ban shim ïa kane ka subjek.