Shillong, Nailar 08 : U kyrtong MP jong ka NPP ha kane ka elekshon MP shiteng samoi, u Dr DRL Nonglait, u la ong ba lada u shah jied kum u MP, un rah ïa ka Bill ha Parliament ban pynrung ïa ka ktien Khasi ha ka Khyrnit kaba Phra bad kumjuh ruh ïa ka mat kaba ïadei bad ka Inner Line Permit ha ka jylla.
Haba kren ha ka jingïalang ïalap elekshon kaba long ha Rymbai, East Jaintia Hills, u Dr Nonglait u la ong ba ha ki por ba la dep u la leit ban ïakynduh ïa ki Myntri Sorkar Pdeng, kynthup ïa u Amit Shah, Kiren Rijiju bad Rajnath Singh, ban buh ïa ki dorkhas halor ki jingdawa jong ki paidbah.
“Hynrei mynta, lada phi jied ïa nga kum u MP, ngan ym leit tang ban buh dorkhas hynrei ngan rah ïa ka Bill ha Parliament ban pynurlong ïa kane,” u la ong.
U la kyntu ïa ki nongthep vote ban buh shabar ïa ki jingsngew ïapher seng saiñpyrthei, da kaba ong ba ka mat jong ka ktien Khasi bad ka ILP ki la dep ban mynjur da ka Iing Dorbar Thawain ka Jylla ryngkat ka jingïatreilang jong ki seng saiñpyrthei bapher bapher.
“Haba ngan leit sha Delhi, ngan ym leit tang kum u MP jong ka NPP, hynrei ngan rah lang ïa ki mat bad ki jingdawa kiba la pynsngew da baroh ki seng saiñpyrthei ha Meghalaya,” u la ong.
Haba kren halor ki jingjop jong ka Sorkar MDA, u Dr Nonglait u la kdew ïa ka jingpynlong ïa Shillong Medical College bad Shillong Engineering College, kumjuh ruh ïa ka jingithuh ïa ka ktien Khasi kum ka Official Language jong ka Meghalaya.
U la ong ba ka Sorkar MDA ka dei ka Sorkar kaba trei, da kaba pynkynmaw ba mynshwa ym pat ju don satia ka Medical College kaba la pynïaid da ka Sorkar jylla.
“Kane ka Sorkar ka dei kaba trei. Mynshwa ym ju don ka Medical College kaba la pynïaid da ka Sorkar jylla, hynrei mynta ka la don namar kane ka Sorkar. Ka Shillong Engineering College ruh ka dei ka jingtrei jong kane ka Sorkar,” u la ong.
U la bynrap ba hadien ba la pynshai ïa kane ka mat sha ki paidbah, ha ka 27 tarik Ïaiong la pynmih ïa ka notification da u Lat ka jylla, kaba pynbna ba ka Ktien Khasi ka la long ka Official Language jong ka Meghalaya.
U Dr Nonglait u la ong ruh ba lada u shah jied, un trei ban pynïar ïa ki campus jong ka State University sha kiwei pat ki distrik jong ka jylla, kynthup ïa ki jaka ha Jaintia Hills.
