CAMP NOU, Nailar 09: U Jorge Messi, u kpa jong u rangïalehkai phutbol ba kynsai tam ka pyrthei na Argentina, u Lionel Messi, ula khlad noh ha ka sngi Saitjaiñ ha Rosario, ha ka rta kaba 68 snem.
Ka longïing jong u Messi, ka la pynpaw ha ka por jong ka FIFA World Cup, ba u Jorge, u don ka jingshitom bad u don hapoh ka jingshah sumar jong ki doktor.
Une u rangbah ba 68 snem ka rta, u la long ruh u agent jong u Lionel bad u la saiñdur ïa ka jingkiew jong u ha Barcelona.
Ki khubor sngewlem ki la tuid sha u Lionel bad kiba ieid jong u katba une u kapten ka Argentina u la mad ïa ka jingduh noh ïa u la u kpa jong u.
Ka Real Madrid, wat hapdeng ka jingïashrut kaba jur bha bad ka Barcelona bad ka jingïadei kaba la slem bha jong u Messi bad katei ka klob jong ka Catalan, ka la ïasnohkti lang ruh bad ka kynhun ïalehkai phutbol ha kaba pynpaw ïa ka jingkyrshan jong ka. Kane ka klob ba redbah na Spain ka la pynpaw ïa ka khubor sngewlem ha ki social media ha kaba ki pynsngew ïa ka jingsngewlem sha u Lionel Messi bad ïa ka ïing ka sem jong u ha kane ka por kaba sngewsih.
“Ka Real Madrid CF, u President jong ka lem bad ki Board of Directors ka dap da ka jingsngewsih halor ka jingkhlad u Jorge Messi, u kpa jong u Leo Messi. Ka club jong ngi ka phah ïa ka jingsngewlem sha u Leo, ïa ka ïing ka sem jong u, bad ïa baroh kiba ieid jong u. To un shongthait ha ka jingsuk,” la pule ka kyrwoh na ka Real Madrid ha ka website.
Ka Barcelona ka la pynpaw ïa ka jingsngewlem jong ka sha u Jorge bad ka ïing ka sem jong u Messi ha ka rynsan X. Ka Barcelona ka la ai khublei ïa u Jorge namar ka jingshaniah kaba u la ai ha ka klob ïa ka jingim jong u Messi naduh kaba sdang bad ïarap ïa u ban roi hapoh ka jingpynïaid jong ki.
“U President bad ka Board of Directors ka FC Barcelona ka sngewsih jur halor ka jingkhlad noh jong u Jorge Messi, u kpa jong u rangïalehkai ba pawnam ka Barcelona, bad na ka liang jong ka Barcelona baroh kawei, ki pynpaw ïa ka jingsngewlem sha ka ïing ka sem jong u Messi.”
“Ka FC Barcelona ka ai khublei ïa u Jorge Messi na ka bynta ka jingaiti jong u ïa ka Club jong ngi, na ka bynta ka jingshaniah ha ngi ïa ka jingsdang bad ki snem ba kyrpang tam jong ka jingim ïalehkai phutbol jong u khun jong u, u Leo. To shongthait ha ka jingsuk,” la pule ka kyrwoh na ka Barcelona.
