Lyngba ka prokram Har Ghar Tiranga yn ïashimbynta u Myntri Rangbah ban pynher ïa ka lama ka ri ha Ri Bhoi

Shillong, Nailar 08: Ka Meghalaya State Rural Livelihoods Society (MSRLS) ka la pynlong ïa ka prokram Har Ghar Tiranga 2026 ha kaba kane ka prokram kan long naduh ka 9 haduh ka 17 tarik u Nailar, 2026 ban pynher ïa ka lama jong ka Ri India ha ki tnum ïing.
Ka thong jong kane ka prokram ka long ban pynsaphriang ïa ka jingieid ri da kaba pynïeng ïa ka lama jong ka ri ha man la ki ïing bad ki ophis, kaba pynïasoh ruh bad ka jingshisha ba kane ka dei ka sngi pynkynmaw kaba 150 snem jong ka jingrwai ri Vande Mataram.
Ki jingpynkhreh ba kongsan hangne ka long ba u Myntri Rangbah ka jylla Meghalaya, u Conrad K. Sangma un pynher ïa ka lama jong ka Ri ha ka 14 tarik u Nailar, 2026 ha Ri-Bhoi District ryngkat ka National Handloom Day. Ka sorkar kan pyndonkam kyrpang da ki lama ba la shna da u sai Eri silk na ka bynta kane ka aïom.
Baroh ki tnat sorkar kin shim bynta ban pynbeit ïa ki rynsan bad ki jaka shon dur ha man la ki ophis, katba ki kynhun ïatreilang ki kynthei bad ki nongshnong shnong kin thaiñ bad pynbiang ïa ki lama ba ki paidbah ki lah ban thied.
Ki paidbah nongshong shnong ka Meghalaya ki lah ruh ban shim bynta da kaba shondur Selfie bad ka Lama bad up-load ha ka website harghartiranga.com.