Shillong, Nailar 07: Ka bor district jong ka East Khasi Hills lyngba ka kyrwoh khubor ka la khang pyrshah ïa ki kali ba heh bad kali kamai ba kin ïeng ne sangeh shipor ha ki rud surok bah (National Highways) bad kane ka hukum kan treikam noh mardor haduh ban da pynbna da kumwei pat.
Lyngba ka hukum ba la pynmih da u District Magistrate Abhilash Baranwal, u la ong ba ïa kane ka rai la shim katkum ka jingbthah jong ka Supreme Court ha ka 13 tarik Ïaïong 2026, kaba ong ba ki kali ki lah ban sangeh tang ha ki jaka ba la ithuh kyrpang ban ïeng, ki lay-byes lane ha ki Wayside Amenities.
Ka bor district ka la kdew ruh ba ki trok bad kiwei kiwei ki kali kamai ki ju pynïeng katba lap ba shem ha ki rud surok jong ki National Highway ha ka distrik, kaba la wanrah ïa ka jingkhapngiah bad ka jingma ïa ka jingshngaiñ jong ki paidbah.
Da kaba kdew ïa ka jingkyrkieh jong kane ka kam, ïa kane ka hukum la pynmih katkum ka kyndon 163 jong ka Bharatiya Nagarik Suraksha Sanhita, 2023.
Katkum katei ka hukum la ong ba kino kino kiba pynkheiñ kin ngat ha ka jingpynshitom katkum ka kyndon 223 jong ka Bharatiya Nyaya Sanhita, 2023, ryngkat bad ki kyndon jong ka Motor Vehicles Act, 1988.
Ka hukum kan neh haduh ar bnai bad yn wah ïa ki jingpynbna paidbah ha ki thanat bad ha ki transport check-gates ba don ha ki surokbah.
Ka hukum ka ong ba kane ka jingbthah ka wan kum shibynta ban pyntreikam ïa ki kyndon ïada ha ki surok bad ban pynthikna ban nym shah pynthut ka jingïaid ki kali ha ki surok National Highways kiba ïaid lyngba ka East Khasi Hills.
