SHILLONG, Nailar 07: Ka Stephen Memorial Higher Secondary School kaba na Mawlai Kynton Massar, ka la ïoh rah ïa ka nam lahduh ha ka lympung ïalehkai kaba la tip kum ka 1st Mawlai Inter School Athletics Meet 2026.
Lah ban kdew ba kane ka lympung ka dei kaba la pynlong da ka Mawlai Games & Literary Association bad ka la sdang naduh ka 23 tarik u Naitung bad la pynhap pyrda noh hynnin ka sngi Thohdieng ka 07 tarik u Nailar 2026 da u MLA ka Mawlai u Bah Brightstarwell Marbaniang kum u kongsan ha ka jingïadon lang u District Sports Officer ka EKHD u Bah Damang Syngkon kum u kongsan kyrpang lem bad ki Principal, ki nonghikai, ki kmie ki kpa jong ki khynnah skul lem bad kiwei kiwei ki nongshah khot sngewbha.
Ka Stephen Memorial Higher Secondary School kaba long ka lahduh ha kane ka lympung ka la ïoh khur haduh 37 tylli ki takma kynthup ïa 17 tylli ki takma ksiar, 14 tylli ki takma rupa bad 6 tylli ki takma rnong.
ïa ka kyrdan ba ar la ïoh da ka Umrynjah Presbyterian Higher Secondary School kaba la ïoh ban khur 28 tylli ki takma kiba kynthup ïa 11 tylli ki takma ksiar 7 tylli ki takma rupa bad 10 tylli ki takma rnong, katba ka MayQueen Secondary School ka la pyndep ha ka kyrdan ba lai da kaba khur 21 tylli ki takma (kynthup ïa 6 tylli ki takma ksiar, 6 tylli ki takma Rupa bad 9 tylli ki takma rnong).
Ha ka ïakob ïaid March past, ka Mawlai Presbyterian Higher Secondary School ka la long ka nongjop.
Nalor ki kynhun lahduh la sam ruh ïa ki khusnam kyrpang sha ki nongïalehkai ba kynsai tam lane Best Athlete ha ki kyrdan bapher bapher.
Ha ka kyrdan Under-14 jong ki shynrang, ïa ka khusnam Best Athlete la khur da u Fenando Jarain jong ka St. Francis D’Assisi Higher Secondary School katba ha ka liang ki kynthei la khur da ka heprit Ruma Deb jong ka Skul Grace Care Academy.
Ha ka kyrdan Under-16, ïa kane ka khusnam la khur da u Hamebankhraw Mawlong jong ka Christ Church Secondary School ha ka liang ki shynrang bad ka Laweibaphyrnai Lawriniang (Umrynjah Presbyterian School) ha ka liang ki kynthei.
Nangta ha ka kyrdan Under-18, ka khusnam Best Athlete napdeng ki shynrang la khur da u Amosstar Syiemlieh jong ka Mawlai Presbyterian Higher Secondary School bad ka Bakmenhun Shangpliang jong ka MayQueen na ka liang ki kynthei.
