25 Nailar yn sdang ka Junior Boys’ NFC na ka bynta ka Dr BC Roy Trophy 2026-27
Shah kynthup ka M’laya ha ka Group C jong ka Tier 1.
NEW DELHI, Nailar 07: Ka samoi 2026-27 jong ka lympung phutbol Junior Boys’ National Football Championship na ka bynta ka Dr BC Roy Trophy, ha ka kyrdan ïakhun jong ka Tier 1 bad 2, kan long naduh ka 25 tarik Nailar haduh ka 09 tarik Nailur 2026.
ïa ki jingïalehkai jong ka Tier 1 yn pynlong ha Bangalore Football Stadium ha Bengaluru, katba ka Tier 2 kan long ha RK Ashram Ground ha Narainpur, Chhattisgarh.
Baroh ar tylli ki kyrdan ïakhun kin don 16 tylli ki kynhun ïalehkai kiba la phiah ha ki saw tylli ki Group ba mar saw kynhun, ha kaba ki ba wan ha khlieh duh na kawei pa kawei ka Group kin ïohrung sha ka semi phainal.
Da kaba bteng ïa ka rukom kyntiew bad pynhiar kyrdan kaba la pyntreikam lai samoi mynshwa, ki ar tylli ki kynhun kiba la poi sha ka phainal na u snem 2025-26 — ka Uttar Pradesh bad ka Assam — ki la kiew sha ka kyrdan Tier 1 na ka bynta u snem 2026-27. Kin bujli ïa ki ar tylli ki kynhun ba pyndep sha trai duh jong ka Tier 1 na ka samoi ba la dep — ka Chhattisgarh bad ka Jharkhand, ki ban ïakhun ha ka Tier 2 mynta ka samoi.
Ha ka Tier 1 ka Manipur ka bat ïa ka nam lahduh, havdien ba ka la pynliem ïa ka West Bengal da 3-0 ha ka phainal ha Amritsar.
Ka jylla Meghalaya, ka ban ïakhun ha ka Tier 1, ka la shah kynthup ha ka Group C ryngkat ki kynhun kum ka Mizoram, Tamil Nadu bad ka Maharashtra. Kan sdang ïa ka jingïalehkai ba nyngkong pyrshah ïa ka Tamil Nadu (01 Nailur), bud sa ka Maharashtra (03 tarik Nailur) bad khatduh ïa ka Mizoram (05 tarik Nailur).
Ka thup na ka bynta ka Group Stage jong ka Junior Boys’ National Football Championship na ka bynta ka Dr BC Roy Trophy 2026-27 Tier 1
Group A: Manipur, Kerala, Telangana, Assam
Group B: West Bengal, Punjab, Karnataka, Chandigarh
Group C: Mizoram, Meghalaya, Tamil Nadu, Maharashtra
Group D: Delhi, Goa, Odisha, Uttar Pradesh
Ka thup na ka bynta ka Group Stage jong ka Junior Boys’ National Football C’ship na ka bynta ka Dr BC Roy Trophy 2026-27 Tier 2
Group A: Andhra Pradesh, Pondicherry, Arunachal Pradesh, Himachal Pradesh
Group B: Tripura, Andaman & Nicobar, Chhattisgarh, Dadra and Nagar Haveli and Daman and Diu
Group C: Bihar, Jharkhand, Uttarakhand, Rajasthan
Group D: Gujarat, Jammu & Kashmir, Madhya Pradesh, Sports Authority of India